23.10.2026 | 23:15
«Մանկական Եվրատեսիլ»-ի քվեարկության առաջին փուլը կմեկնարկի այս գիշեր
«Ուկրաինան երբեք չի սպառնացել Բելառուսին». Զելենսկին Կիևում հանդիպել է Սվետլանա Տիխանովսկայային
Քաղաքականություն
26.05.2026 | 19:51
Ուկրաինայի նախագահ Վլադիմիր Զելենսկին Կիևում հանդիպել է բելառուսական ընդդիմության առաջնորդ Սվետլանա Տիխանովսկայայի և նրա թիմի հետ, գրում է BBC-ի ռուսական ծառայությունը։
«Մենք բոլորս աջակցում ենք բելառուս ժողովրդի՝ ռուսական միջամտությունից ազատվելու ձգտմանը, և գիտենք, որ Ռուսաստանը հիմա փորձում է Բելառուսին ավելի խորը ներքաշել Ուկրաինայի դեմ պատերազմի մեջ։ Ուկրաինան երբեք չի սպառնացել Բելառուսին։ Եվ մենք շնորհակալ ենք այն բելառուսներին, ովքեր այժմ կանգնած են Ուկրաինայի կողքին, երբ որոշվում է մեր անկախության և Ռուսաստանին սահմանակից յուրաքանչյուր ազգի անկախության ճակատագիրը»,- գրել է նա սոցցանցերում հանդիպումից հետո։
Բելառուսի ներկայացուցիչները մասնակցել են Կիևում ընթացող Քաղաքների և տարածաշրջանների միջազգային գագաթնաժողովին։
«Վերջերս [Բելառուսի նախագահ Ալեքսանդր] Լուկաշենկոն ասել էր, որ ժամանակն է, որ Ուկրաինայի և Բելառուսի նախագահները հանդիպեն։ Հետաքրքիր ստացվեց՝ ասաց Լուկաշենկոն, իսկ ժամանեց Սվետլանա Տիխանովսկայան»,- շեշտել է Զելենսկին։
Սվետլանա Տիխանովսկայայի Կիև ժամանման ֆոնին Բելառուսի Անվտանգության խորհրդի պետական քարտուղար Ալեքսանդր Վոլֆովիչը հայտարարել է, որ անցյալ շաբաթ երկրի սահմանները հատել է 116 ուկրաինական անօդաչու թռչող սարք։ Նա հավելել է, որ այդ «ներխուժումներից» ոչ բոլորն են պատահական եղել։ Վոլֆովիչը հայտարարել է, որ Ուկրաինան փորձում է «հարվածել սահմանային ենթակառուցվածքների տարրերին»։
Թարգմանությունը՝ Էմմա Չոբանյանի
