Կրեմլի հաշվարկն այն է, որ տնտեսական շանտաժով ազդեն ընտրողի քվեի վրա․ Լևոն Բարսեղյան. ՏԵՍԱՆՅՈՒԹ

«Ռուսաստանը Հայաստանի դեմ տնտեսական շանտաժի և պատժամիջոցներ կիրառելու սպառնալիքներ է հնչեցնում՝ հունիսի 7-ին ընտրողի կամքի վրա հօգուտ պրոռուսական ուժերի ազդելու նպատակով»,- Factor TV-ի հետ հարցազրույցում ասել է Գյումրիի «Ասպարեզ» ակումբի խորհրդի նախագահ Լևոն Բարսեղյանը։ Նա պնդում է՝ եթե ՌԴ-ն իրական մտահոգություններ ունենար Հայաստանի՝ ԵՄ -ին անդամակցելու մտադրության հետ կապված, ապա դրանք կարտահայտեր 1 տարի 3 ամիս առաջ, երբ ընդունվեց ԵՄ-ին անդամակցելու մեկնարկ նախատեսող օրենքը, այլ ոչ հիմա՝ ընտրություններին ընդառաջ։

«Ռուսաստանի Դաշնության իշխանական վերնախավի ներկայացուցիչները, այդ թվում՝ Պուտինը, Շոյգուն, Մեդվեդևը և ուրիշներ, հերթական անգամ նկատելով, որ նախկին գաղութը հետևողականորեն և անխուսափելիորեն հեռանում է Մոսկվայից, ձեռնամուխ են լինում իրենց սիրած հին մեթոդներին, որոնք փորձել են կիրառել Մոլդովայի, Ուկրաինայի և էլի համանման երկրների նկատմամբ։ Դա շանտաժն է։ Կոնկրետ այս դեպքում տնտեսական, գազային շանտաժն է։ Այս զրույցները նոր չեն, այսինքն սա պարբերաբար կիրառվել է հեռացող գաղութների նկատմամբ։ Ձեռքները հնարավորություն լինի՝ զինված ճանապարհով կփորձեն սահմանափակել»։

Լևոն Բարսեղյանը նշում է, որ ինչքան էլ Ռուսաստանի սպառնալիքները նպատակ ունեն ազդելու ընտրությունների արդյունքների վրա, այդուհանդերձ, անհրաժեշտ է իրական գործողությունների մակարդակով պատրաստվել դիմագրավելու հնարավոր պատժամիջոցներին, այդ թվում՝ Արևմուտքի աջակցությունը ներգրավելով։

«Ի՞նչ պիտի անի Հայաստանի իշխանությունը։ Շատ վաղուց պիտի աներ, ինչ-որ բան արել է, բայց ես համարում եմ, որ թերի է արել։ Խոսքը այլընտրանքների, այլընտրանքային շուկաների, էներգետիկ, պարենային անվտանգության ապահովմանն ուղղված հրատապ ջանքերն էին… Գազի մատակարարման հնարավոր խափանումներ կարող են լինել, կամ գազը թանկացնում է՝ հասցնում է եվրոպական գներին՝ 580 դոլար, ասենք թե, ինչը Մեդվեդևն էր չէ՞ ասում։ Այդ տարբերությունը ինչպե՞ս է լրացնելու՝ մինչև Հայաստանը այլընտրանքային գազի աղբյուր ունենա։ Օրինակ՝ դա կարող է լինել սուբվենցիա կամ դրամաշնորհ ԵՄ-ի կողմից»,- ասաց բանախոսը։

Հարցազրույցն ամբողջությամբ դիտեք այս հղումով։