Եթե Հայաստանը դուրս գա ԵՏՄ-ից, գազի արտոնյալ գինը կդառնա շուկայական. Պեսկով

Ռուսաստանը էներգակիրների հուսալի մատակարար է, հատկապես՝ իր գործընկերների համար։ Սակայն Երևանին գրավող արտոնյալ գազի գինը կարող է ձևավորվել շուկայական հիմունքներով, եթե Հայաստանը որոշի դուրս գալ Եվրասիական տնտեսական միությունից (ԵՏՄ)։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է ՏԱՍՍ-ը։

«Մենք լսել ենք Հայաստանի ղեկավարության հայտարարությունները, որ ռուսական գազի և էներգակիրների համար շատ գրավիչ, ավելի քան արտոնյալ գին կա։ Դա իսկապես ճիշտ է. Ռուսաստանը մնում է հուսալի և պատասխանատու էներգակիրների մատակարար բոլոր երկրների, հատկապես՝ իր ամենամոտ դաշնակիցների և գործընկերների համար։ Նման ռեժիմն անհնար է այլ ինտեգրացիաների մասնակիցների համար, իհարկե, դա ԵՄ է։ Այնտեղ գների մակարդակը բոլորովին այլ է՝ շուկայական է։ Մեր ընկերները Երևանում լավ գիտակցում են դա»,- ընդգծել է Կրեմլի խոսնակը։

Պեսկովը «հետագա տնտեսական ինտեգրման ուղու ընտրությունը բաց հարց է անվանել», սակայն հիշեցրել, որ Մոսկվա կատարած այցի ժամանակ Նիկոլ Փաշինյանն «ասել է, որ Հայաստանը մնում է ԵՏՄ լիիրավ անդամ, միաժամանակ, զարգացնում է հարաբերություններն արտաքին քաղաքականության այլ ոլորտներում, մասնավորապես, Եվրոպայի հետ»։

«Ինչպես այն ժամանակ բացատրեց Փաշինյանը՝ որոշակի պահի անհրաժեշտ կլինի վերջնական որոշում կայացնել, և դա կարվի հանրաքվեի միջոցով։ Այսինքն՝ խոսքը կասի հայ ժողովուրդը»,- նշել է Պեսկովը։

Ըստ նրա՝ Կրեմլն ակնկալում է, որ Հայաստանը ներկայացված կլինի ԵՏՄ գագաթնաժողովում, որը տեղի կունենա այս շաբաթ Ղազախստանում:

«Եթե չեմ սխալվում, վարչապետ Նիկոլ Փաշինյանը չի մասնակցի՝ նախընտրական քարոզարշավի նկատառումներից ելնելով: Միևնույն ժամանակ, մենք ակնկալում ենք, որ հայկական կողմը կմասնակցի այս շատ կարևոր հանդիպմանը՝ այս կամ այն ​​կերպ, շարունակելով իր անդամակցությունը ԵՏՄ-ին»,- հայտարարել է Պեսկովը։

Հիշեցնենք, որ «Ռոսսելխոզնադզորն» ավելի վաղ հայտարարել էր, որ խնդիրներ է գրանցում Հայաստանից ոչ միայն ծաղիկների, այլև բանջարեղենի և մրգերի մատակարարումների հետ կապված։ Բացի այդ, «Ռոսպոտրեբնադզոր»-ը դադարեցրել է հայկական երեք ընկերությունների արտադրած ալկոհոլային խմիչքների վաճառքը։

Թարգմանությունը՝ Էմմա Չոբանյանի