Քոչարյանը հրճվում է. ունեմ կասկածներ` այնպես են անում, որ հայ արտադրողները խնդիրներ ունենան ՌԴ-ում. Պապոյան․ ՏԵՍԱՆՅՈՒԹ

Էկոնոմիկայի նախարար Գևորգ Պապոյանը Factor TV-ի հետ զրույցում, անդրադառնալով Լարսի անցակետում առաջացած խնդիրներին, հայտարարեց, որ իրավիճակը մեծ խնդիր չի ներկայացնում և պայմանավորված է մի շարք գործոններով՝ Հայաստանի և Ռուսաստանի միջև ապրանքաշրջանառության ու զբոսաշրջային հոսքերի աճով, ինչպես նաև ՌԴ-ում կիրառվող որոշ խստացումներով։

Նրա խոսքով՝ հայկական ընկերությունների մի մասն արդեն հարմարվել է նոր պահանջներին, մյուսներն էլ առաջիկայում կկարողանան լուծել խնդիրները։ Պապոյանը նաև քաղաքական ենթատեքստ տեսավ ստեղծված իրավիճակում:

«Կան ընդդիմադիր ուժեր, որոնք, օրինակ, Քոչարյան Ռոբերտը, էնպես ա արտահայտվում ցանկացած պրոբլեմի ժամանակ, էնպիսի մեծ երջանկություն է գալիս իր դեմքին ցանկացած լուրի ժամանակ, երբ որ իմանում է, որ մեր հայ արտադրողները, հայ արտահանողները որևէ խնդիր են ունենում Լարսում: Եվ ես ենթադրում եմ և ունեմ շատ որոշակի հիմնավոր կասկածներ, որ նրանք որոշակի շրջանակներում փորձում են էնպես անել, որ մեր հայ արտադրողների համար խնդիրներ առաջանան Ռուսաստանի Դաշնությունում»,- ասաց Պապոյանը։

Նախարարը հայտարարեց, որ իրավիճակը կկարգավորվի հունիսի 8-ից հետո, երբ, իր խոսքով, «Քաղաքացիական պայմանագիրը» բարձր արդյունք կարձանագրի ընտրություններում։ Նա նշեց, որ այդ պահից հետո Ռուսաստանի հետ համագործակցությունն ավելի սահուն կընթանա, իսկ ներքաղաքական խռովությունները կավարտվեն։

Պապոյանն անդրադարձավ նաև «Մայր Հայաստան» շարժման առաջնորդ, ԲՀԿ նախընտրական ցուցակի 2-րդ համար Անդրանիկ Թևանյանի նկատմամբ հարուցված քրեական վարույթին։ Նա նշեց, որ իրեն չեն զարմացնում այս զարգացումները և ակնարկեց, որ գործով կարող են ներգրավվել նաև այլ անձինք, այդ թվում՝ «Հայաստան» խմբակցության ներկայացուցիչներ։

Մանրամասները՝ տեսանյութում։