Պիտի նենց գետինը մտնի, որ ժողովրդի աչքին չերևա. Ծառուկյանը` Փաշինյանին

Լրագրողների հետ ճեպազրույցում «Բարգավաճ Հայաստան» կուսակցության առաջնորդ Գագիկ Ծառուկյանն անդրադարձել է Նիկոլ Փաշինյանի հայտարարություններին, իրեն հասցեագրված մեղադրանքներին և «Արարատցեմենտի» շուրջ ստեղծված իրավիճակին։

Նիկոլ Փաշինյանի՝ «պլինտուսից ցածր մակարդակի» մասին հայտարարությանը ի պատասխան, Ծառուկյանը հիշեցրել է իր կատարած աշխատանքները.

«Ես իմ երկրի պատիվը բարձր եմ պահել, հաղթանակներ եմ պարգևել… Զարգացրել եմ, կառուցել եմ աշխատատեղեր, դպրոցներ, մանկապարտեզներ, եկեղեցիներ, կառուցում եմ Քրիստոսի արձանը… Իսկ էդ մարդը՝ ասողը, լիարժեք պետք է ընենց (գետինը-խմբ.) մտնի, որ չերևա, որովհետև դա խայտառակություն ա՝ էդքան զոհեր տալ, հողը հանձնել, ժողովրդին անտուն թողնել…»։

Լրտեսության  մեղադրանքների վերաբերյալ ԲՀԿ առաջնորդը նշել է, որ նման բան ասողն իրավունք չունի ապրելու.

«Ես ասել եմ՝ թող ինձ հրապարակում գնդակահարեն… Շպիոնը՝ դա էդ մարդը աշխարհում, իր հայրենիքի շպիոնը նա իրավունք չունի ապրելու։ Ես պահանջել եմ՝ ապացուցեք, որ շպիոն է, ես իմ ձեռով հրապարակում գնդակահարեմ»։

«Արարատցեմենտ» գործարանը խլելու հնարավորության մասին հարցին Ծառուկյանը պատասխանել է, որ 25 տարի առաջ գործարանը օրինական գնել է, և այժմ այն հսկայական հարկեր է վճարում (ամսական 400-500 մլն դրամ)։ Նա նաև ահազանգեց իշխանությունների՝ Ադրբեջանից ցեմենտ բերելու մտադրության մասին.

«Որոշել են, որ Ադրբեջանից էժան ցեմենտ բերեն… Եթե ուզում են խլեն, ոչ մի խնդիր, թող Ազգային ժողովով օրենք հանեն, իրենց փայաբաժինն ունենան կամ վճարեն, վերցնեն»։

Հիշեցնենք՝ ՀՀ վարչապետ Նիկոլ Փաշինյանը հայտարարել էր, որ «Արարատցեմենտը», որը պատկանում էր Ծառուկյանին, շատ շուտով դե յուրե վերադարձվելու է ՀՀ ժողովրդին։ Ավելի ուշ Դատախազությունը հաղորդում էր ներկայացրել «Արարատցեմենտ»-ի մասնավորեցման վերաբերյալ։