16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Տոպուրիա․ «Եթե Գեյջին հրաժարվի մենամարտից, Ծառուկյանը չի փոխարինի նրան»
21.05.2026 | 16:12
UFC-ի թեթև քաշային կարգի գործող չեմպիոն Իլյա Տոպուրիան կարծիք է հայտնել, որ Արման Ծառուկյանը չի մենամարտի իր հետ, եթե ամերիկացի Ջասթին Գեյջին հրաժարվի Վաշինգտոնի Սպիտակ տանը կայանալիք մրցաշարի մասնակցությունից։ Ավելի վաղ UFC-ի նախագահ Դանա Ուայթը հայտարարել էր, որ հայ մարտիկը լինելու է Տոպուրիա – Գեյջի մենամարտի պահեստայինը։
«Եթե Գեյջին հրաժարվի մենամարտի մասնակցությունից, Ծառուկյանը չի փոխարինի նրան։ Նա չի մենամարտի ինձ հետ։ Եթե նրան առաջարկեն կարճ ժամանակահատվածում պատրաստվել իմ դեմ մենամարտին, նա կհրաժարվի։ Նա միայն կհայտնվի կշռման արարողությանը, քանի որ նրան միշտ պահեստային են պահում իմ մենամարտերի համար»,- Ալվարո Կոլմեներոյի հետ հարցազրույցում ասել է Իլյա Տոպուրիան։
Հիշեցնենք, որ Սպիտակ տան մրցաշարը տեղի կունենա հունիսի 14-ին։ Տոպուրիան ու Գեյջին կհանդիպեն գլխավոր մենամարտում ու կվիճարկեն Իսպանիան ներկայացնող վրացի մարտիկին պատկանող տիտղոսը։
Արման Ծառուկյանը UFC-ի թեթև քաշային կարգի դասակարգման երկրորդ համարն է։ 29-ամյա հայ մարտիկը UFC-ում նորամուտը նշել է 2019 թվականին, նախորդ մենամարտն անցկացրել է 2025թ․ նոյեմբերի 22-ին՝ խեղդող հնարքով հաղթելով նորզելանդացի Դեն Հուկերին։ Խառը մենամարտերում Հայաստանի ներկայացուցիչը մասնակցել է 26 հանդիպման, տարել 23 հաղթանակ ու կրել 3 պարտություն։
