06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Մինչև 12 տարեկան երեխա ունեցող ծնողները կկարողանան «ծնողական ժամից» օգտվել․ ՏԵՍԱՆՅՈՒԹ
Հասարակություն
21.05.2026 | 14:09
ՀՀ կառավարությունը հավանություն է տվել ՀՀ աշխատանքային օրենսգրքում փոփոխություններ և լրացումներ կատարելու նախագծին, որով սահմանվում է «ծնողական ժամ» հասկացությունը։ Այն հնարավորություն կտա աշխատող ծնողներին բացակայել աշխատանքից՝ աշխատավարձի պահպանմամբ՝ երեխայի խնամքի հետ կապված հարցերը լուծելու նպատակով։
Ինչպե՞ս է գործելու «ծնողական ժամը»
Նախագծի համաձայն՝ հնարավորությունից կարող են օգտվել խնամքին մինչև 12 տարեկան երեխա ունեցող, ինչպես նաև մինչև 18 տարեկան հաշմանդամություն ունեցող երեխաների ծնողները (ներառյալ խնամակալները).
-
Մինչև 2 երեխա ունեցողներին՝ օրական առավելագույնը 30 րոպե։
-
3 և ավելի երեխա ունեցողներին՝ օրական առավելագույնը 1 ժամ։
-
Մինչև 18 տարեկան հաշմանդամ երեխա ունեցողներին՝ օրական առավելագույնը 1 ժամ՝ անկախ երեխաների թվից։
Առաջարկվող փոփոխությունները տարածվելու են և՛ պետական, և՛ մասնավոր հատվածի աշխատողների վրա։
Հետագա քայլեր և թվայնացում
Քննարկման ընթացքում փոխվարչապետ Մհեր Գրիգորյանը նշել է, որ աշխատանքային պայմանագրերի թվայնացումից հետո հնարավոր կլինի ավելի ճկուն մեխանիզմներ կիրառել, օրինակ՝ «ծնողական ժամերը» կուտակելու կամ ծնողների միջև վերաբաշխելու տեսքով։ Ներկայումս նման կուտակային մեխանիզմ նախատեսված չէ, սակայն նշվել է, որ հարցը քննարկման առարկա կդառնա Ազգային ժողովում՝ լսումների փուլում։
Նախագիծը մշակվել է աշխատանքային և ընտանեկան պարտականությունների համատեղումը խթանելու և սոցիալական պաշտպանությունը բարելավելու նպատակով։
Մանրամասները՝ տեսանյութում։
