ԵՄ-ն Իտալիայի նախկին վարչապետ Դրագիին դիտարկում է Պուտինի հետ բանակցողի դերում. FT

Եվրամիությունը դիտարկում է քաղաքական գործիչների թեկնածություններ, որոնք կարող են ներկայացնել Միությունը ՌԴ նախագահ Վլադիմիր Պուտինի հետ Ուկրաինայում պատերազմը դադարեցնելու հնարավոր բանակցություններում: Այս դերի համար ամենախոստումնալից թեկնածուն Եվրոպական կենտրոնական բանկի նախկին նախագահ, Իտալիայի նախկին վարչապետ Մարիո Դրագին է, գրել է բրիտանական Financial Times-ը՝ հղում անելով աղբյուրներին, նշում է DW-ի ռուսական ծառայությունը։

Այլ թեկնածուների թվում են Գերմանիայի նախկին կանցլեր Անգելա Մերկելը և Ֆինլանդիայի երկու նախագահներ՝ Ալեքսանդր Ստուբը և նրա նախորդը՝ Սաուլի Նիինիստյոն: Financial Times-ի տվյալներով՝ ԵՄ արտաքին գործերի նախարարները հաջորդ շաբաթ կհանդիպեն Կիպրոսում՝ այս հարցը քննարկելու համար:

Աղբյուրները նաև հայտնում են, որ Ուկրաինան ու Միացյալ Նահանգներն աջակցում են Ռուսաստանի հետ հնարավոր բանակցություններին ԵՄ ներկայացուցչի մասնակցության գաղափարին: FT-ի մի քանի աղբյուրներ ընդգծել են՝ Վաշինգտոնը հասկանում է, որ Թրամփի վարչակազմի՝ Ուկրաինայում ռազմական ​​գործողությունները դադարեցնելու փորձերը «չեն աշխատում»:

Ուկրաինացի բարձրաստիճան պաշտոնյան Financial Times-ին ասել է, որ նախագահ Վլադիմիր Զելենսկին կցանկանար, որ «Դրագիի նման մեկը» կամ «ուժեղ, գործող պետական ​​առաջնորդ» ղեկավարի ԵՄ բանակցությունները։

Իր հերթին, Անգելա Մերկելը երկուշաբթի հայտարարել է, որ իրեն չի համարում Պուտինի հետ բանակցող, և որ գործող քաղաքական գործիչները պետք է ներկայացնեն ԵՄ շահերը։

Բրյուսելի աղբյուրը Financial Times-ին հայտնել է, որ չնայած Ֆինլանդիայի նախկին նախագահ Սաուլի Նիինիստյոն «այն քիչ եվրոպացիներից է, որը պահպանել է աշխատանքային հարաբերություններ Պուտինի հետ» Ռուսաստանի կողմից Ուկրաինա լայնածավալ ներխուժումից հետո, Կրեմլը «շատ դժգոհ է» ՆԱՏՕ-ին նրա երկրի անդամակցությունից:

«Կարծում եմ՝ դա պետք է լինի Նիդերլանդների կամ Պորտուգալիայի նման երկրներից մեկը, որոնք նույն պատմությունը չունեն, ինչ Արևելյան Եվրոպայի երկրները»,- լրատվամիջոցը մեջբերում է եվրոպացի բարձրաստիճան պաշտոնյայի խոսքերը:

Թարգմանությունը՝ Էմմա Չոբանյանի