Վրաստանի վարչապետ Իրակլի Կոբախիձեն կառավարության աշխատակազմում կայացած ճեպազրույցի ժամանակ հայտարարել է եվրոպական կառույցների ղեկավարներին ուղղված բաց նամակի մասին։ Նա կենտրոնացել է Դանիայի մայրաքաղաքում տեղի ունեցող իրադարձությունների վրա։ Նա նշել է , որ Կոպենհագենում խաղաղ ցույցը ցրելու համար ոստիկանության կողմից ուժի կիրառումը, այդ թվում՝ մահակների և շների օգտագործումը, լուրջ հարցեր է առաջացնում Եվրամիության կողմից հայտարարված ժողովրդավարական չափանիշների վերաբերյալ։ Այս մասին ասվում է JAM News-ի անդրադարձում։
Կոբախիձեն դիմել է Եվրահանձնաժողովի նախագահ Ուրսուլա ֆոն դեր Լեյենին, ԵՄ Խորհրդի նախագահ Անտոնիու Կոշտային և Եվրախորհրդարանի նախագահ Ռոբերտա Մեցոլային՝ հարց ուղղելով, թե ինչպես են գնահատում Կոպենհագենում տեղի ունեցած բռնությունները և ինչպես են նման գործողությունները համապատասխանում ԵՄ-ի կողմից մշտապես ընդգծվող ժողովրդավարական և մարդու իրավունքների չափանիշներին։
Նրա խոսքով՝ Եվրոպայում տեղի ունեցող գործընթացները կապված են «ժողովրդավարական հետընթացի, տնտեսական լճացման, միգրացիոն ճգնաժամի, պատմական հիշողության ճնշման և ազգային ինքնության թուլացման հետ»։
Մի քանի օր առաջ պաղեստինամետ ցուցարարները փակել էին Կոպենհագենում գտնվող Maersk-ի գլխավոր գրասենյակի մուտքերը։ Նրանք բողոքում էին ընկերության կողմից Իսրայելի հետ կապված ապրանքների հնարավոր տեղափոխման դեմ։ Դանիական ոստիկանությունը տարածքը մաքրելու և կարգուկանոն վերականգնելու համար ուժ է կիրառել, այդ թվում՝ մահակներ, ֆիզիկապես հեռացնելով ցուցարարներին տարածքից։
Ըստ Իրակլի Կոբախիձեի՝ Վրաստանը պատմականորեն, մշակութային առումով և իր արժեքներով եվրոպական տարածքի մաս է կազմում, ԵՄ անդամակցության թեկնածու երկիր է, որը ձգտում է «եվրոպական ընտանիքին լիիրավ անդամակցության»։ Նա նաև հայտարարել է, որ ԵՄ բյուրոկրատիան «միակողմանիորեն» դադարեցրել է Վրաստանի հետ քաղաքական երկխոսությունը, որից հետո Թբիլիսիի կողմից առաջարկվող համագործակցության և քննարկման ձևաչափերը բազմիցս մերժվել են։
Կոբախիձեն հայտարարել է, որ Վրաստանի համար Եվրոպան ոչ միայն քաղաքական կամ տնտեսական միություն է, այլև, առաջին հերթին, ընկալվում է որպես քրիստոնեական բարոյականության, ազատության, հավասարության և ժողովրդավարական սկզբունքների վրա հիմնված ընդհանուր քաղաքակրթական և արժեքային տարածք։ Նա ասել է, որ Եվրամիությունը գնալով ավելի ու ավելի է անտեսում հասարակության «բնական, մշակութային և պատմական հիմքերը», ինչը, ըստ Կոբախիձեի, հեռացնում է եվրոպական տարածքը այն սկզբունքներից, որոնք այն դարձրել են ժողովրդավարության և մարդու իրավունքների պաշտպանության խորհրդանիշ։
Նամակի վերջում Կոբախիձեն ընդգծել է, որ Վրաստանը Եվրամիությունից ակնկալում է հստակ պատասխաններ միության ներսում զարգացումների ուղղության և Եվրոպայի համար առկա ճգնաժամերի հնարավոր ելքի վերաբերյալ։
Վրաստանի վարչապետի հայտարարություններին արձագանքել է «Ախալի» կուսակցությունից Նիկա Գվարամիան․ «Ակնհայտ է, որ Կոբախիձեի ասած ամեն ինչ խելագարություն է։ Բայց դա պարզապես օդում դատարկ կրակոց չէ (չնայած Կոբախիձեն դրանցից շատ ունի)։ Ոչ, դա խելագարություն է, որը պարունակում է վտանգավոր ցուցանիշներ»։
Ըստ Գվարամիայի՝ ակնհայտ է, որ ողջամիտ մարդը Կոբախիձեի այս բաց նամակը կհամարի խելագարություն, որն արժանի է միայն ծաղրի, «բայց, ցավոք, խելագարությունը միայն ձև է, մինչդեռ բովանդակությունը լուրջ սպառնալիք է. Վրաստանը մնում է Եվրոպայից դուրս»։
Թարգմանությունը՝ Էմմա Չոբանյանի
