Ռուսաստանը հարվածել է Ուկրաինայի մի քանի շրջանների.կան զոհեր ու վիրավորներ

Ռուսական զորքերը մայիսի լույս 20-ի գիշերը Ուկրաինայի վրա արձակել են «Իսկանդեր-Մ» բալիստիկ հրթիռ և 154  հարվածային ԱԹՍ-ներ, խոցվել է դրանցից 131-ը, հաղորդում են Ուկրաինայի ռազմաօդային ուժերը։

Դնեպրում ռուսական հարվածների հետևանքով վնասվել են սննդի պահեստ, մասնավոր տներ և մեկ մեքենա։ Տարածաշրջանային ռազմական վարչակազմի ղեկավար Ալեքսանդր Գանժայի խոսքով՝ զոհվել է երկու մարդ, ևս վեցը՝ վիրավորվել, որոնցից երեքը ծանր վիճակում են, գրում է Current time-ը։

Սումիի մարզի Կոնոտոպ քաղաքում ավերվել են բազմաբնակարան շենքի երկրորդից չորրորդ հարկերը: Ուկրաինայի արտակարգ իրավիճակների պետական ​​ծառայությունը հայտնել է, որ փրկարարական աշխատանքները ժամանակավորապես դադարեցվել են հետագա հարձակումների սպառնալիքի պատճառով: Առայժմ հայտնի է ութ մարդու վիրավորվելու մասին:

Օդեսայում վնասվել են բնակելի շենքեր, պահեստներ և կրիտիկական ենթակառուցվածքի օբյեկտ: Պետական ​​արտակարգ իրավիճակների ծառայության տվյալներով՝ քաղաքի թաղամասերից մեկում ավերվել և հրդեհվել է մասնավոր տուն: Մեկ անօդաչու թռչող սարք հարվածել է անավարտ 24 հարկանի բնակելի շենքի:

Զապորոժիեի ռազմական վարչակազմի ղեկավար Իվան Ֆյոդորովը հայտնել է Վոլնյանսկում մասնավոր տան վրա հարվածի մասին: Հարձակման հետևանքով տունն ամբողջությամբ ավերվել է, իսկ պայթյունի ալիքն ու բեկորները վնասել են մի մեքենա և հարևան տներ: Վիրավորվել է չորս մարդ՝ տղամարդ, կին և երկու երեխա՝ 2 տարեկան տղա և 12 տարեկան աղջիկ։

Խարկովի Նովոբավարսկի շրջանում ռուսական հարվածից վիրավորվել է 16-ամյա աղջիկ:

Թարգմանությունը՝ Էմմա Չոբանյանի