ԱՄՆ Սենատն առաջ է մղել Իրանի պատերազմում Թրամփի ռազմական լիազորությունները սահմանափակելու բանաձևը

ԱՄՆ Սենատը մայիսի 19-ին հանդես է եկել բանաձևի քննարկման օգտին, որը նախագահ Դոնալդ Թրամփից պահանջում է կա՛մ դադարեցնել Իրանի դեմ բոլոր ռազմական գործողությունները, կա՛մ ստանալ Կոնգրեսի պաշտոնական թույլտվությունը՝ ուժ կիրառելու համար: Եթե այն ընդունվի, Թրամփը պարտավոր կլինի ստանալ Կոնգրեսի հաստատումը Իրանում ապագա ցանկացած ռազմական գործողության համար, հաղորդում է CNN-ը:

Ընթացակարգային քվեարկության ընթացքում 50 սենատոր կողմ է քվեարկել բանաձևի հետագա առաջխաղացմանը Կոնգրեսի վերին պալատում, 47-ը՝ դեմ: CNN-ի տվյալներով՝ երեք հանրապետական ​​սենատորներ բացակայել են քվեարկությունից  քարոզարշավի պատճառով, ինչը քիչ հավանական է դարձնում բանաձևի հաստատումը Սենատի լիագումար նիստում, գրում է DW-ի ռուսական ծառայությունը։

Տարեսկզբին հանրապետականներն արգելափակել էին այս բանաձևը Սենատում առաջ մղելու նախորդ յոթ փորձերը: Փաստաթուղթն առաջին անգամ քվեարկության է դրվել մարտին՝ Իրանի դեմ ԱՄՆ-ի և Իսրայելի ռազմական գործողությունների սկսվելուց հետո: Բանաձևը նաև երեք անգամ արգելափակվել է ԱՄՆ Ներկայացուցիչների պալատի հանրապետականների կողմից:

Դեմոկրատ սենատոր Թիմ Քեյնը, որը նախաձեռնել էր ընթացակարգային քվեարկությունը, նշել է, որ ԱՄՆ-ի և Իրանի միջև ապրիլի սկզբից ուժի մեջ մտած հրադադարը Թրամփին հնարավորություն է տալիս իր դիրքորոշումը ներկայացնել Կոնգրեսին։

«Սա իդեալական ժամանակ է այս քննարկումն անցկացնելու համար, նախքան մենք կրկին պատերազմի մեջ կմտնենք։ Նախագահը ստանում է խաղաղության և դիվանագիտական ​​առաջարկներ, որոնք նա նետում է աղբարկղը՝ առանց մեզ հետ կիսվելու»,- Քեյնի խոսքերն է մեջբերում Reuters-ը։

1973 թվականի «Պատերազմական լիազորությունների մասին» (War Powers Act) օրենքի համաձայն՝ ԱՄՆ նախագահը կարող է ռազմական գործողություններ իրականացնել առանց Կոնգրեսի հաստատման ընդամենը 60 օրվա ընթացքում։ Այս ժամանակահատվածից հետո նախագահը պարտավոր է կա՛մ դադարեցնել պատերազմը, կա՛մ Կոնգրեսից պաշտոնական թույլտվություն խնդրել ռազմական ուժ կիրառելու համար։

2026 թվականի մայիսի 1-ին, 60-օրյա ժամկետը լրանալուց հետո, Դոնալդ Թրամփը Կոնգրեսին տեղեկացրել էր, որ «ավարտել է պատերազմն» Իրանի հետ։ Սակայն ԱՄՆ-ը շարունակում է շրջափակել Իրանի նավահանգիստները և հարվածել իրանական նավերին։

Թարգմանությունը՝ Էմմա Չոբանյանի