28.09.2026 | 18:10
ԲՀԿ-ի մասով ԵԽԽՎ-ն խնդիր է տեսել ընտրություններում // Զինվորի մահվան գործով կալանավորված կա․ ԼՈՒՐԵՐ
Գերմանիան Թուրքիայում Patriot համակարգեր կտեղակայի
Քաղաքականություն
19.05.2026 | 19:47
Գերմանիան ՆԱՏՕ-ի ռոտացիայի շրջանակում Թուրքիայում կտեղակայի Patriot հակահրթիռային պաշտպանության մարտկոց, հայտարարել է այդ երկրի Պաշտպանության նախարարությունը։ Ըստ գերատեսչության՝ հյուսիսային Հուսում քաղաքում տեղակայված մոտ 150 զինվորներ հունիսի վերջից մինչև սեպտեմբեր կտեղափոխվեն Թուրքիա՝ Patriot հակահրթիռային համակարգով։
Նշվում է, որ տեղափոխությունը ռոտացիայի մաս է, որը կփոխարինի ներկայում տեղակայվող ամերիկյան ստորաբաժանմանը։
«Գերմանիան ավելի մեծ պատասխանատվություն է ստանձնում ՆԱՏՕ-ի շրջանակում։ Մեր զինվորների կողմից թուրք և ամերիկացի գործընկերների հետ իրականացվող սերտ աշխատանքը ցույց է տալիս, թե որքան հուսալիորեն ենք մենք համագործակցում մեր դաշնակիցների հետ»,- ասել է պաշտպանության նախարար Բորիս Պիստորիուսը։
Patriot-ն ամերիկյան արտադրության շարժական հակաօդային պաշտպանության համակարգ է, որը նախատեսված է մարտավարական բալիստիկ հրթիռները, ցածր թռչող թևավոր հրթիռներն ու ինքնաթիռները որսալու համար։
ԱՄՆ ստորաբաժանումը տեղափոխվել էր թուրքական պաշտպանությունը հզորացնելու համար՝ ի պատասխան Իրանի հրթիռային հարձակումների, որոնք հարվածել էին Ամերիկայի դաշնակիցներին տարածաշրջանում փետրվարի վերջին ԱՄՆ-ի և Իսրայելի կողմից Թեհրանի դեմ պատերազմ սկսելուց հետո։
ՆԱՏՕ-ի ուժերը պատերազմի սկսվելուց ի վեր առնվազն երեք անգամ իրանական բալիստիկ հրթիռներ են խոցել Թուրքիայի վրա։
Գերմանիան նախկինում Patriot համակարգեր է տեղակայել Թուրքիայում 2013-2015 թվականներին՝ Սիրիայի հետ սահմանին օդային տարածքը պաշտպանելու համար։
Պաշտպանության նախարարությունը հայտնել է, որ տեղակայվող Patriot համակարգը բաղկացած է մինչև ութ արձակիչից, ինչպես նաև ռադարային միավորից և կրակի կառավարման կետից։
Թարգմանությունը՝ Էմմա Չոբանյանի
