«Ռուսաստանը կրկին ստում է». Լատվիան պատասխանել է ռուսական հետախուզության մեղադրանքներին

Լատվիան օդային տարածք չի տրամադրում Ռուսաստանի վրա հարձակումների համար։ Սա բազմիցս բացատրվել է Ռուսաստանի ներկայացուցիչներին։ Այս մասին հայտարարել է Լատվիայի արտաքին գործերի նախարար Բաիբա Բրաժեն՝ ի պատասխան ՌԴ արտաքին հետախուզության ծառայության (СВР) մամուլի ծառայության կողմից երեքշաբթի հրապարակված հայտարարության, գրում է BBC-ի ռուսական ծառայությունը։

СВР-ը պնդում է, որ Ուկրաինայի իշխանությունները, իբր, համոզել են Ռիգային համաձայնվել Ռուսաստանին հարվածներ հասցնել Լատվիայի տարածքից, և որ Ուկրաինայի զինված ուժերի անօդաչու համակարգերի ուժերի անձնակազմն արդեն տեղակայված է երկրի ռազմաբազաներում։

«Ռուսաստանը կրկին ստում է»,- գրել է Լատվիայի արտաքին գործերի նախարարը X-ում՝ հավելելով, որ СВР-ը Լատվիայի դեմ ապատեղեկատվական արշավ է վարում:

Ռուսաստանի արտաքին հետախուզության ծառայությունը հայտարարել էր, թե Կիևը պլանավորում է անօդաչու թռչող սարքեր արձակել ռուսական թիկունքի շրջաններին Բալթյան երկրներից։ Մասնավորապես, ծառայությունը պնդում է, թե Ուկրաինայի իշխանությունները, իբր, համոզել են Ռիգային համաձայնվել Ռուսաստանի դեմ գործողությանը, և որ Ուկրաինայի զինված ուժերի անօդաչու համակարգերի ուժերի անձնակազմն արդեն տեղակայվել է Լատվիայում։

Թվարկվել են նաև լատվիական հինգ ռազմական բազաներ, որտեղ, ըստ իրենց տեղեկությունների, տեղակայված են ուկրաինական զորքեր՝ Ադաժի, Սելիյա, Լիելվարդե, Դաուգավպիլս և Եկաբպիլս։

Ռուսական կողմը հայտարարության մեջ նաև սպառնում է «արդարացի հատուցմամբ», որից «ՆԱՏՕ-ին երկրի  անդամակցությունը չի պաշտպանի»։

Թարգմանությունը՝ Էմմա Չոբանյանի