Ուկրաինական ԱԹՍ-ները հարձակվել են Յարոսլավլի վրա. դեպի Մոսկվա ճանապարհը մի քանի ժամով փակվել է

Ուկրաինական անօդաչու թռչող սարքերը մայիսի լույս 19-ի գիշերը հարվածել են Յարոսլավլին։ Շրջանի ղեկավար Միխայիլ Եվրաևի խոսքով՝ դրանց մեծ մասը խոցվել է, սակայն մեկը հարվածել է արդյունաբերական օբյեկտի։ Ըստ նահանգապետի՝ հրդեհը մարվում է, տուժածներ չկան, նշում է Meduza-ն։

ԱԹՍ-ների հարձակման պատճառով Յարոսլավլից դեպի Մոսկվա տանող ճանապարհը ժամանակավորապես փակվել է։ Եվրաևը չի մանրամասնել պատճառները։ Քաղաքից ելքը դեպի Մոսկվա գտնվում է արդյունաբերական գոտու մոտ, որտեղ, ի թիվս այլ բաների, տեղակայված է նավթավերամշակման գործարան։

Ուկրաինական Supernova+ ալիքը պնդում է, որ հարված է հասցվել Յարոսլավլ-3 նավթի պոմպակայանին։ Հրապարակման պահին այս տեղեկատվությունը դեռևս չի հաստատվել։

Ուկրաինական անօդաչու թռչող սարքերը բազմիցս հարձակվել են Յարոսլավլի արդյունաբերական օբյեկտների վրա: Օրինակ՝ ապրիլի վերջին ուկրաինական ԱԹՍ-ները հարվածել են Յարոսլավլի «Սլավնեֆտ-ՅԱՆՈՍ» նավթավերամշակման գործարանին, որը Ռուսաստանի ամենամեծ նավթավերամշակման գործարաններից մեկն է: Նույն գործարանը հարձակման է ենթարկվել նաև մայիսի սկզբին: Աղբյուրները հայտնել են, որ հարվածները ստիպել են նավթավերամշակման գործարանին կտրուկ կրճատել կամ ժամանակավորապես դադարեցնել արտադրությունը:

Ռուսաստանի Պաշտպանության նախարարությունը հայտնել է 315 ուկրաինական անօդաչու թռչող սարքի խոցման մասին, այդ թվում՝ Յարոսլավլի, Նովգորոդի, Ռյազանի, Պսկովի, Տամբովի, Տվերի և Տուլայի մարզերի, ինչպես նաև Մոսկվայի մարզի վրա։ Մոսկվայի քաղաքապետ Սերգեյ Սոբյանինն էլ հայտնել է, որ մայիսի 19-ի առավոտյան ՀՕՊ ուժերի կողմից քաղաքի վրա խոցվել է չորս անօդաչու։

Թարգմանությունը՝ Էմմա Չոբանյանի