02.07.2026 | 02:50
ԱԱ-2026. Բելգիան կամային հաղթանակ տարավ 0:2-ից հետո. ՏԵՍԱՆՅՈՒԹ
Փարիզի դատախազություն են դիմել Էփշտեյնի՝ նախկինում անհայտ շուրջ 10 նոր ենթադրյալ զոհեր
Քաղաքականություն
18.05.2026 | 22:07
Ամերիկացի ֆինանսիստ Ջեֆրի Էփշտեյնի՝ նախկինում անհայտ շուրջ 10 ենթադրյալ զոհեր կապ են հաստատել Փարիզի դատախազության հետ։ Այս մասին RTL հեռուստաալիքի եթերում հայտարարել է Փարիզի դատախազ Լորա Բեկկոն, գրում է The Insider-ը։
RTL-ը նշում է, որ սա Փարիզի դատախազության կողմից քննվող գործով զոհերի ընդհանուր թիվը հասցնում է մոտավորապես 20-ի: Բեկկոյի խոսքով՝ այս հետաքննության նպատակն է բացահայտել Էփշտեյնի հնարավոր հանցակիցներին Ֆրանսիայում: Քննիչները հավաքում են զոհերի ցուցմունքները, որոնցից մի քանիսն ապրում են Ֆրանսիայից դուրս: Այնուհետև նրանք մտադիր են վերլուծել ֆիզիկական ապացույցները՝ Էփշտեյնի արխիվից «ավելի քան 1,5 միլիոն ֆայլեր»: Հավանական կասկածյալներից ոչ մեկը դեռևս չի հարցաքննվել:
Բեկկոն ասել է, որ զոհերից մի քանիսի ինքնությունը նախկինում հայտնի էր, օրինակ՝ Ժերար Մարիի՝ Փարիզի Elite մոդելային գործակալության նախկին ղեկավարի գործով։
«Սակայն մյուսները՝ մոտ տասը մարդ, առաջին անգամ են բացահայտվել»,- ասել է դատախազը։
Ջեֆրի Էփշտեյնը 2008 թվականին դատապարտվել էր անչափահաս աղջկա մարմնավաճառության մեջ ներգրավելու համար։ 2019 թվականի ամռանը նա կրկին ձերբակալվել և մեղադրվել էր կանանց, այդ թվում՝ անչափահասների թրաֆիքինգի և նրանց մարմնավաճառության մեջ ներգրավելու մեջ։ Էփշտեյնին շուտով մահացած էին գտել իր բանտախցում. պաշտոնապես նա ինքնասպան է եղել։ Նրա հանցակից Գիսլեյն Մաքսվելը դատապարտվել է 20 տարվա ազատազրկման։
2025 թվականի վերջից ի վեր ԱՄՆ Արդարադատության նախարարությունը, Կոնգրեսի հանձնարարականով, սկսել է գաղտնազերծել «Էփշտեյնի ֆայլերը», որոնք պարունակում են զոհերի ցուցմունքներ և փաստաթղթեր, վերաբերում են բազմաթիվ հայտնի մարդկանց՝ քաղաքական գործիչների, միլիարդատերերի և թագավորական ընտանիքների անդամների։
Թարգմանությունը՝ Էմմա Չոբանյանի
