16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Թրամփի հատուկ դեսպանը ժամանել է Գրենլանդիա՝ մասնակցելու բիզնես համաժողովի
Քաղաքականություն
18.05.2026 | 15:19
ԱՄՆ հատուկ դեսպան Ջեֆ Լենդրին, որը Դոնալդ Թրամփի կողմից անցյալ տարի նշանակվել է՝ Գրենլանդիայի նկատմամբ ամերիկյան վերահսկողությունը խթանելու համար, կիրակի ժամանել է Գրենլանդայի մայրաքաղաք Նուուկ, գրում է Reuters-ը։
Լուիզիանայի նահանգապետ Լենդրին նախկինում աջակցել է Թրամփի՝ Արկտիկայի հսկայական տարածքը Միացյալ Նահանգների մաս դարձնելու նպատակին։ Այս ձգտմանը կտրականապես դեմ են թե՛ Գրենլանդիայի, թե՛ Դանիայի կառավարությունները, որոնք բազմիցս հայտարարել են՝ Գրենլանդիան վաճառքի համար չէ։ Լենդրին պետք է մասնակցի «Ապագայի Գրենլանդիա» բիզնես համաժողովին մայիսի 19-20-ը, նրան կուղեկցի Դանիայում ԱՄՆ դեսպան Քենեթ Հաուերը։
Համաժողովի կազմակերպիչ Business Greenland-ը հատուկ չի հրավիրել Լենդրիին, բայց ասել է, որ միջոցառումը բաց է բոլորի համար։
Կոպենհագենում ԱՄՆ դեսպանատունն այս շաբաթվա սկզբին հայտարարել էր, որ Լենդրին և Հաուերը «կհանդիպեն գրենլանդացիների լայն շրջանակի հետ՝ լսելու և սովորելու, տնտեսական հնարավորությունները ընդլայնելու, մարդկանց միջև կապեր հաստատելու և Միացյալ Նահանգների ու Գրենլանդիայի միջև փոխըմբռնումը մեծացնելու նպատակով»։
Լարվածությունը մեղմելու նպատակով Գրենլանդիան, Դանիան և ԱՄՆ-ն այս տարվա սկզբին համաձայնեցին բարձր մակարդակի դիվանագիտական բանակցություններ վարել ճգնաժամը լուծելու համար, չնայած ընթացող բանակցությունների արդյունքները դեռևս չեն ներկայացվել։
Գրենլանդիայի վարչապետ Յենս-Ֆրեդերիկ Նիլսենն այս շաբաթվա սկզբին հայտարարել էր, որ ԱՄՆ ռազմական ներկայության ավելացումը Վաշինգտոնի հետ ընթացող բանակցությունների մի մասն է։
Այցի ընթացքում Լենդրիի և Գրենլանդիայի քաղաքական գործիչների միջև պաշտոնական հանդիպումներ նախատեսված չեն։
Թարգմանությունը՝ Էմմա Չոբանյանի
