Թրամփը զգուշացնում է Իրանին՝ գործարքի «ժամանակը սպառվում է»

ԱՄՆ նախագահ Դոնալդ Թրամփը կրկին սպառնացել է Իրանին ոչնչացմամբ՝ փորձելով ճնշում գործադրել Թեհրանի վրա՝ պատերազմն ավարտելու գործարքին համաձայնելու համար, գրում է DW-ն։

«Իրանի համար ժամանակը սպառվում է, և նրանք պետք է արագ գործեն, թե չէ նրանցից ոչինչ չի մնա։ Ժամանակն էական է», – գրել է Թրամփը իր Truth Social հարթակում։

Ապրիլի սկզբին համաձայնություն էր ձեռք բերվել հրադադարի մասին, որը Թրամփը վերջերս երկարաձգեց, սակայն Իրանի հետ դեռևս որևէ կայուն համաձայնագիր չի կնքվել։ Անցյալ շաբաթ ԱՄՆ նախագահը հայտարարել էր, որ հրադադարը գտնվում է «կենսական փուլում»։

Կիրակի իրանական լրատվամիջոցները հայտնել են, որ Միացյալ Նահանգները որևէ կոնկրետ զիջում չի կատարել Իրանի կողմից պատերազմը դադարեցնելու բանակցությունների առաջարկվող օրակարգին իր վերջին արձագանքում։ Fars գործակալությունը հաղորդել է, որ Վաշինգտոնը ներկայացրել է հինգ կետից բաղկացած ցանկ, որը ներառում է պահանջ՝ պահպանել միայն մեկ միջուկային օբյեկտի գործունեություն և Միացյալ Նահանգներին հանձնել բարձր հարստացված ուրանի պաշարները։

Վաշինգտոնը նաև հրաժարվել է ազատել Իրանի սառեցված ակտիվների «նույնիսկ 25 տոկոսը» արտասահմանում կամ որևէ փոխհատուցում վճարել պատերազմի ընթացքում Իրանին հասցված վնասի համար։

«Միացյալ Նահանգները, չառաջարկելով որևէ շոշափելի զիջում, ցանկանում է ստանալ այն զիջումները, որոնք չի կարողացել ստանալ պատերազմի ընթացքում, ինչը կհանգեցնի բանակցությունների փակուղու»,- իր հերթին, գրել է Mehr գործակալությունը։

Թարգմանությունը՝ Էմմա Չոբանյանի