Ըմբշամարտի միջազգային ֆեդերացիան (UWW) բելառուս և ռուս ըմբիշներին թույլ կտա առանց սահմանափակումների մասնակցել առաջիկա մրցումներին, ասվում է կազմակերպության հայտարարության մեջ։
Թարմացված կանոնների համաձայն՝ Բելառուսի և Ռուսաստանի ըմբիշները բոլոր տարիքային խմբերում, այդ թվում՝ մեծահասակների, հանդես կգան իրենց ազգային դրոշների ներքո։ Այժմ մարզիկների և անձնակազմի համազգեստների վրա կարող են նշվել երկրների RUS և BLR հապավումները, իսկ եթե նրանց ըմբիշները նվաճեն ոսկե մեդալներ, պարգևատրման արարողության ժամանակ կհնչի երկու երկրների պետական օրհներգերը։
UWW-ի մրցումների մյուս բոլոր կանոնակարգերը կմնան ուժի մեջ՝ միջազգային ըմբշամարտի կանոններին համապատասխան։
2026 թվականի հունվարին UWW-ն թույլատրել էր Ռուսաստանի և Բելառուսի բոլոր ըմբիշներին մինչև 23 տարեկանների տարիքային կարգում ազգային դրոշների ներքո մասնակցել մրցաշարերին՝ հետևելով Միջազգային օլիմպիական կոմիտեի (ՄՕԿ) առաջարկին, ըստ որի՝ բելառուսական կամ ռուսական անձնագրեր ունեցող այդ տարիքային խմբի մարզիկներն այլևս չպետք է բախվեն մրցումներին մասնակցելու սահմանափակումների հետ։
