11.06.2026 | 22:17
Ժոզե Մոուրինյուն՝ «Ռեալի» գլխավոր մարզիչ
Պուտինը մայիսի 20-ին Չինաստան կայցելի․ ԶԼՄ-ներ
Քաղաքականություն
15.05.2026 | 15:52
Ռուսաստանի նախագահ Վլադիմիր Պուտինի՝ Չինաստան այցի ամսաթվերի վերաբերյալ պաշտոնական հայտարարությունը կհրապարակվի շատ շուտով, բոլոր պարամետրերն արդեն համաձայնեցված են։ Այս մասին լրագրողներին հայտնել է Ռուսաստանի նախագահի մամուլի քարտուղար Դմիտրի Պեսկովը, գրում է Ինտերֆաքսը։
Լրագրողների հարցին՝ արդյո՞ք հաստատում է չինական լրատվամիջոցների հաղորդագրություններն այն մասին, որ Ռուսաստանի առաջնորդը մայիսի 20-ին կայցելի Չինաստան, Կրեմլի խոսնակը պատասխանել է. «Մենք շատ շուտով պաշտոնական հայտարարություն կանենք, քանի որ դա անում ենք մեր չինացի ընկերների հետ համակարգված։ Պարզապես չենք ուզում շտապել։ Դա իսկապես շատ շուտով կլինի։ Այցի նախապատրաստական աշխատանքներն արդեն ավարտվել են, բոլոր շփումները կայացել են, և այցի բոլոր հիմնական պարամետրերը համաձայնեցված են»։
Ինչ վերաբերում է օրակարգին, Պեսկովն ասել է՝ առաջին հերթին երկկողմ հարաբերություններն են, հատուկ արտոնյալ ռազմավարական գործընկերությունը և առևտրատնտեսական համագործակցության զգալի ծավալը, որը կայուն գերազանցում է 200 միլիարդ դոլարը։
«Եվ, իհարկե, միջազգային հարցերը նույնպես կլինեն օրակարգի ակտիվ թեմաներից մեկը»,- հավելել է Պեսկովը։
South China Morning Post-ը, հղում անելով բարձրաստիճան աղբյուրներին, հայտնել էր, որ Ռուսաստանի նախագահ Վլադիմիր Պուտինը կարող է այցելել Չինաստան մայիսի 20-ին՝ ԱՄՆ նախագահ Դոնալդ Թրամփի Պեկին ժամանելուց մեկ շաբաթ անց։
Աղբյուրների փոխանցմամբ՝ Ռուսաստանի առաջնորդը Չինաստանում կմնա մեկ օր։ Այցը, հավանաբար, չի ներառի պաշտոնական դիմավորում կամ շքերթ, քանի որ առաջնորդների բանակցությունները «Ռուսաստանի և Չինաստանի առօրյա գործերի մաս են կազմում»։
Թարգմանությունը՝ Էմմա Չոբանյանի
