Լավրովը հայտարարել է, թե Մոսկվայի և Երևանի միջև հարաբերությունները բարդ են Արևմուտքի պատճառով

Ռուսաստանն ու Հայաստանը ներկայում ունեն սերտ, բայց բարդ հարաբերություններ՝ հաշվի առնելով Երևանին «ենթարկեցնելու»՝ Արևմուտքի փորձերը։ Նման հայտարարություն է արել Ռուսաստանի արտաքին գործերի նախարար Սերգեյ Լավրովը Նյու Դելիում ԲՐԻԿՍ-ի նախարարական հանդիպումից հետո կայացած մամուլի ասուլիսում, գրում է ՏԱՍՍ-ը։

«Մենք հարաբերություններ ունենք Հայաստանի հետ։ Այդ հարաբերությունները սերտ են, դաշնակցային, բայց, միևնույն ժամանակ, բարդ են՝ հաշվի առնելով, թե ինչպես է Արևմուտքը, հետևելով Անկախ Պետությունների Համագործակցության որոշ այլ անդամների օրինակին, փորձում կրկին ենթարկեցնել Հայաստանը և խզել Հայաստանի փոխշահավետ տնտեսական, առևտրային և ներդրումային կապերը ԱՊՀ-ում և Եվրասիական տնտեսական միության իր գործընկերների հետ»,- ասել է ռուսաստանցի պաշտոնյան։

Նա նաև նշել է, թե Մոսկվայի ու Երևանի միջև հարաբերությունները կքննարկվեն մայիսի վերջին Ղազախստանում կայանալիք Եվրասիական տնտեսական միության գագաթնաժողովում, որին ՀՀ վարչապետ Նիկոլ Փաշինյանը չի կարողանա մասնակցել։

«Ռուսաստանի և Հայաստանի միջև հարաբերությունները քննարկելու հնարավորություն կստեղծվի մայիսի վերջին, երբ Ղազախստանում կկայանա Եվրասիական տնտեսական բարձրագույն խորհրդի գագաթնաժողովը»,- ասել է ՌԴ նախարարը։

Նրա խոսքով՝ Նիկոլ Փաշինյանը նախկինում նշել է, որ զբաղված է նախընտրական հարցերով և չի կարողանա մասնակցել ԵՏՄ ղեկավարների հանդիպմանը։

«Դա, իհարկե, ցավալի է, քանի որ լավ հնարավորություն կլիներ՝ քննարկելու այն հարցերը, որոնք այժմ կախված են օդում»,- հայտարարել է Լավրովը։