Թրամփը հայտարարել է, որ Իրանի հետ այլևս շատ համբերատար չի լինի

ԱՄՆ նախագահ Դոնալդ Թրամփը հայտարարել է, որ Իրանի հետ այլևս շատ համբերատար չի լինի՝ կոչ անելով Թեհրանին համաձայնության գալ Վաշինգտոնի հետ, միաժամանակ ենթադրելով, որ Իրանի հարստացված ուրանը վերադարձնելու ձգտումն ավելի շատ ընկալման, քան անվտանգության հարց է, գրում է Reuters-ը։

«Ես չեմ պատրաստվում այլևս շատ համբերատար լինել։ Նրանք պետք է գործարք կնքեն»,- ասել է Թրամփը Fox News-ի «Hannity» հաղորդման ժամանակ։

Իրանից հարստացված ուրանը դուրս բերելու անհրաժեշտության մասին հարցին Թրամփը պատասխանել է․ «Ես չեմ կարծում, որ դա անհրաժեշտ է, բացառությամբ՝ PR տեսանկյունից։ Իրականում ես պարզապես ավելի լավ կզգամ, եթե այն ստանամ։ Բայց կարծում եմ, որ դա ավելի շատ PR-ի  համար է, քան որևէ այլ բանի»։

ԱՄՆ-ը, որը աշխարհում միջուկային զենք ունեցող ճանաչված ինը երկրներից մեկն է, պնդում է, որ Իրանը պետք է իր բարձր հարստացված ուրանի պաշարները տեղափոխի արտասահման և հրաժարվի ներքին հարստացումից։

Թեհրանը հերքում է միջուկային զենքի ձեռքբերման մասին պնդումները, սակայն շեշտում՝ իրավունք ունի մշակելու միջուկային տեխնոլոգիաներ խաղաղ նպատակներով, այդ թվում՝ հարստացման համար, որպես Միջուկային զենքի չտարածման մասին պայմանագրի կողմ։

Իրանի խորհրդարանի փոխխոսնակ Էբրահիմ Ռեզային երեքշաբթի հայտարարել է, որ կրկին հարձակման ենթարկվելու դեպքում երկիրը կարող է հարստացնել ուրանը մինչև 90% մաքրության, որը համարվում է զենքի համար նախատեսված մակարդակ։

ԱՄՆ-ն ու Իսրայելը փետրվարի 28-ին հարձակվել էին Իրանի վրա։ Թեհրանը պատասխանել է հարվածներով Իսրայելի և Պարսից ծոցի այն երկրների վրա, որտեղ տեղակայված են ԱՄՆ ռազմաբազաները։

Մարդու իրավունքների պաշտպանությամբ զբաղվող կազմակերպությունները լայնորեն քննադատել են Թրամփին պատերազմի ընթացքում իր հռետորաբանության համար, այդ թվում՝ երբ նա սպառնացել էր հարձակվել քաղաքացիական ենթակառուցվածքների վրա և ոչնչացնել Իրանի ամբողջ քաղաքակրթությունը։

Թարգմանությունը՝ Էմմա Չոբանյանի