Չինաստանը Մերձավոր Արևելքում երկարատև հրադադարի և նավագնացության ուղիների «հնարավորինս շուտ» վերաբացման կոչ է անում

Չինաստանը կշարունակի գործել նախագահ Սի Ցզինպինի չորս առաջարկներին համապատասխան և կաշխատի միջազգային հանրության հետ՝ խաղաղության բանակցություններին ավելի ուժեղ աջակցություն ցուցաբերելու և Մերձավոր Արևելքում երկարատև խաղաղության հասնելու գործում կառուցողական դեր խաղալու համար։ Այս մասին հայտարարել է Չինաստանի արտաքին գործերի նախարարության խոսնակը՝ պատասխանելով Իրանում ստեղծված իրավիճակի վերաբերյալ հարցերին, գրում է Սինհուա գործակալությունը։

ԱՄՆ նախագահ Դոնալդ Թրամփի և Չինաստանի առաջնորդ Սի Ցզինպինի միջև Պեկինում կայացած հանդիպումից հետո ԱԳՆ խոսնակին հարցրել են՝ արդյո՞ք երկու առաջնորդները քննարկել են այս թեման։ Նա պատասխանել է, որ Իրանի հակամարտության սկսվելուց ի վեր Չինաստանն աշխատում է հակամարտության դադարեցման և խաղաղության հասնելու ուղղությամբ, հավելելով, որ նախագահ Սին առաջ է քաշել Մերձավոր Արևելքում խաղաղության և կայունության պահպանման ու խթանման վերաբերյալ չորս առաջարկ, իսկ Չինաստանն ու Պակիստանը ներկայացրել են հինգ կետից բաղկացած նախաձեռնություն՝ Պարսից ծոցի և Մերձավոր Արևելքի տարածաշրջանում խաղաղության և կայունության վերականգնման համար։

Խոսնակը նշել է, որ Չինաստանի դիրքորոշումը Իրանի իրավիճակի վերաբերյալ շատ հստակ է․ «Այս հակամարտությունը շարունակելու իմաստ չկա, որն ի սկզբանե չպետք է տեղի ունենար։Իրավիճակի շուտափույթ կարգավորման ուղի գտնելը ոչ միայն Միացյալ Նահանգների և Իրանի, այլև տարածաշրջանային երկրների և մնացած աշխարհի շահերից է բխում»։

Նա հավելել է՝ ԱՄՆ-Իրան վերջերս կնքված հրադադարը և խնդիրները բանակցությունների միջոցով լուծելու ջանքերը ողջունվում են տարածաշրջանային երկրների և միջազգային հանրության կողմից՝ հավելելով, որ Չինաստանը միշտ կարծում է, որ երկխոսությունն ու բանակցությունները առաջ շարժվելու ճիշտ ուղին են, իսկ ուժի կիրառումը՝ փակուղի։

Չինացի դիվանագետը նաև նշել է, որ կարևոր է հնարավորինս շուտ վերաբացել նավագնացության ուղիները՝ միջազգային հանրության կոչին արձագանքելու և համաշխարհային մատակարարման շղթաները համատեղ կայուն ու անխոչընդոտ պահելու համար։

«Կարևոր է հնարավորինս շուտ հասնել համապարփակ և երկարատև հրադադարի, հնարավորություն տալ Մերձավոր Արևելքում և Պարսից ծոցի տարածաշրջանում շուտափույթ վերականգնել խաղաղությունն ու կայունությունը, ինչպես նաև հիմք դնել տարածաշրջանի համար կայուն անվտանգության ճարտարապետության կառուցման համար»,- հայտարարել  է խոսնակը։

Սպիտակ տունն ավելի վաղ  Չինաստանի և ԱՄՆ-ի նախագահներ Սի Ցզինպինի և Դոնալդ Թրամփի միջև հանդիպումը որակել էր որպես «լավ»։

Ըստ հաղորդագրության՝ Սի  Ցզինպինը հստակեցրել էր, որ Չինաստանը դեմ է Հորմուզի նեղուցի ռազմականացմանը և դրա օգտագործման համար վճար գանձելու ցանկացած ջանքի, նաև հետաքրքրություն  հայտնել ավելի շատ ամերիկյան նավթ գնելու հարցում՝ ապագայում նեղուցից Չինաստանի կախվածությունը նվազեցնելու համար: Երկու երկրներն էլ համաձայնել էին, որ «Իրանը երբեք չի կարող միջուկային զենք ունենալ»։

Թարգմանությունը՝ Էմմա Չոբանյանի