25.06.2026 | 07:04
ԱԱ-2026. Մեքսիկան դարձյալ հաղթեց, ՀԱՀ-ը դուրս եկավ փլեյ-օֆֆ. ՏԵՍԱՆՅՈՒԹ
ԱՄՆ-ն հետաձգել է Լեհաստանում 4000 զինծառայողի տեղակայումը
Քաղաքականություն
14.05.2026 | 14:57
ԱՄՆ-ն անսպասելիորեն հետաձգել է 1-ին հեծելազորային դիվիզիայի 2-րդ զրահատանկային բրիգադի՝ Լեհաստանում տեղակայումը, որը պետք է ժամաներ զորքերի պլանավորված ռոտացիայի շրջանակում: Այս մասին հաղորդել են The Wall Street Journal-ը և Defense News-ը, գրում է DW-ի ռուսական ծառայությունը։
Նշվում է, որ Պենտագոնն այս որոշումը կայացրել է ԱՄՆ նախագահ Դոնալդ Թրամփի՝ Եվրոպայում ամերիկյան զորքերի քանակը կրճատելու ծրագրին համապատասխան, սակայն դա «զարմացրել է որոշ զինվորական պաշտոնյաների»։ Մայիսի 13-ին ԱՄՆ Պատերազմի նախարարության պաշտոնյան հաստատել է այս տեղեկությունը, բայց լրացուցիչ մանրամասներ չի տրամադրել՝ խորհուրդ տալով մեկնաբանությունների համար ուղղակիորեն կապվել Պենտագոնի հետ, հաղորդում է Defense News-ը։ Սակայն հրապարակման պահին գերատեսչությունը դեռ չէր պատասխանել հարցումներին։
Մայիսի 12-ին Կոնգրեսում ԱՄՆ բանակի բյուջեի լսումների ժամանակ ո՛չ ԱՄՆ բանակի նախարար Դանիել Դրիսկոլը, ո՛չ էլ բանակի շտաբի պետի տեղակալ, գեներալ Քրիստոֆեր ԼաՆևը չեն հիշատակել Լեհաստանում զորքերի տեղակայման չեղարկման մասին: Սակայն, ըստ Defense News-ի, տեղեկությունը սկսել է տարածվել ոչ պաշտոնական ուղիներով, այդ թվում՝ ամերիկացի զինվորների անձնական հաղորդագրությունների միջոցով՝ ուղղված իրենց ընտանիքներին:
Միևնույն ժամանակ, The Wall Street Journal-ը հիշեցնում է ԱՄՆ-ի վերջերս ընդունած որոշումը՝ չեղարկել Գերմանիայում 5000 զինվորների տեղակայումը, Գերմանիայի կանցլեր Ֆրիդրիխ Մերցի կողմից Իրանի դեմ ԱՄՆ-Իսրայել պատերազմի քննադատությունից հետո:
Մայիսի 14-ին լեհական իշխանությունները հերքել էին ամերիկյան լրատվամիջոցների հաղորդագրությունները, որ Պենտագոնն անսպասելիորեն հետաձգել է 4000 զինվորականների տեղակայումը երկրում։
«Այս հարցը չի վերաբերում Լեհաստանին. այն կապված է Եվրոպայում որոշ ամերիկյան ուժերի ներկայության հետ կապված նախկինում հայտարարված փոփոխության հետ։ Լեհաստանի զինված ուժերի արագ զարգացող կարողությունները և ԱՄՆ ուժերի ներկայությունը Լեհաստանում ամրապնդում են ՆԱՏՕ-ի արևելյան թևը»,- ասել է Լեհաստանի պաշտպանության նախարար Վլադիսլավ Կոսինյակ-Կամիշը, փոխանցում է լեհական PAP լրատվական գործակալությունը։
Իր հերթին, Լեհաստանի պաշտպանության փոխնախարար Չեզարի Տոմչիկը պարզաբանել է, որ «այս հաղորդագրությունը վերաբերում է Գերմանիային»։
«Դա չի վերաբերում Լեհաստանին։ Լեհաստանը մշտապես ձգտում է մեծացնել ամերիկյան զորքերի ներկայությունը»,- ասել է նա։
Անցյալ տարի Պենտագոնը դուրս էր բերել մեկ ամերիկյան զորքերի բրիգադ, որը հետո ռոտացիոն կարգով տեղակայվել էր Ռումինիայում: Այս քայլը քննադատության է արժանացել Կոնգրեսի հանձնաժողովների ղեկավարների կողմից։ Մեկնաբանելով Պենտագոնի որոշումը՝ ՆԱՏՕ-ից DW-ին բացատրել էին, որ Դաշինքի ղեկավարությունը տեղյակ էր Ռումինիայում իր զորակազմը կրճատելու՝ ԱՄՆ ծրագրերի մասին:
«ԱՄՆ ուժերի տեղակայման ճշգրտումներն անսովոր չեն: Նույնիսկ այս ճշգրտմամբ՝ ԱՄՆ ռազմական ներկայությունը Եվրոպայում մնում է ավելի մեծ, քան եղել է երկար տարիներ, մայրցամաքում զգալիորեն ավելի շատ ամերիկյան զորքեր կան, քան մինչև 2022 թվականը»,- հայտարարել էր ՆԱՏՕ-ի ներկայացուցիչը։
2026 թվականի սկզբին ԱՄՆ Կոնգրեսը հաստատել է Պենտագոնի տարեկան բյուջեի մասին օրենքի դրույթները, որոնք արգելում են Եվրոպայում ԱՄՆ ուժերի թվաքանակը 76,000-ից կրճատել ավելի քան 45 օր, մինչև Պենտագոնի ղեկավարը և Եվրոպական հրամանատարության (EUCOM) ղեկավարը Կոնգրեսին չներկայացնեն առանձին զեկույցներ՝ հիմնավորելով նման որոշումը։
Թարգմանությունը՝ Էմմա Չոբանյանի
