Ռուսական կողմն ԱԹՍ-ներով հարձակվել է ուկրաինական շրջանների վրա. զոհեր և վիրավորներ կան

Ռուսական զորքերը մայիսի լույս 13-ի գիշերը անօդաչու թռչող սարքերով հարձակվել են Ուկրաինայի հյուսիս-արևելքում գտնվող Խարկով քաղաքի վրա, հայտարարել է քաղաքապետ Իգոր Տերեխովը։ Ըստ նրա՝ գրանցվել է երկու հարված՝ Շևչենկովսկի և Խոլոդնոգորսկի շրջաններում, գրում է DW-ի ռուսական ծառայությունը։

«Շևչենկովսկի շրջանում թշնամու անօդաչու թռչող սարքի բեկորներն ընկել են ճանապարհի վրա. այս պահին վիրավորներ չկան: Խոլոդնոգորսկի շրջանում թշնամին հարվածել է ենթակառուցվածքային օբյեկտի. բախման վայրում հրդեհ է բռնկվել: Այս պահին վիրավորների մասին տեղեկություններ չկան»,- գրել է Տերեխովը Տելեգրամում։

Խարկովի մարզում վերջին 24 ժամվա ընթացքում վիրավորվել է հինգ մարդ, հայտնել է մարզային վարչակազմի ղեկավար Օլեգ Սինեգուբովը։

Ուկրաինայի ռազմաօդային ուժերը գիշերը նախազգուշացումներ են տարածել, որ մարտական ​​անօդաչու թռչող սարքեր են ուղղվում դեպի Խարկով: Բացի այդ, Կիևում և Ուկրաինայի մեծ մասում օդային հարձակման մասին տագնապներ են հայտարարվել՝ ռուսական ուժերի կողմից բալիստիկ զենքի կիրառման սպառնալիքի պատճառով:

Ուկրաինական կողմի հաղորդմամբ՝ մայիսի լույս 13-ի գիշերը ռուսական զորքերն Ուկրաինայի տարածքի ուղղությամբ արձակել են 139 անօդաչու թռչող սարք, որոնցից 111-ը չեզոքացվել է:

Գիշերը Պոլտավայում պայթյուններ են լսվել։

«Թշնամին հարձակվել է Պոլտավա համայնքի վրա։ Թշնամու անօդաչու թռչող սարքերը հարվածել են էլեկտրական ենթակայանին։ Ավելի քան 6500 բնակելի և 548 բիզնես բաժանորդներ մնացել են առանց էլեկտրաէներգիայի»,- հայտնել է Պոլտավայի տարածաշրջանային ռազմական վարչակազմի ղեկավար Վիտալի Դյակովնիչը։

Նրա խոսքով՝ վնասվել են նաև մոտակա բնակելի շենքերի պատուհանները։ Տուժածների մասին դեռևս տեղեկություններ չկան։

Դնեպրոպետրովսկի մարզում զոհվել է 8 մարդ, հայտնել է մարզային վարչակազմի ղեկավար Ալեքսանդր Գանժան։

Ռուսաստանի Պաշտպանության նախարարությունն ու Կրեմլը երեկ հայտարարել էին, որ մայիսի լույս 12-ի գիշերը եռօրյա հրադադարի ժամկետը լրացել է, և ռուսական բանակը վերսկսել է հարվածներն Ուկրաինայի տարածքի ուղղությամբ։

Թարգմանությունը՝ Էմմա Չոբանյանի