25.10.2026 | 01:23
Հայաստանը հաղթեց «Մանկական Եվրատեսիլ»-ում
Կատարի և Թուրքիայի ԱԳ նախարարները հայտարարել են, որ Իրանը չպետք է Հորմուզի նեղուցը որպես զենք օգտագործի
Քաղաքականություն
12.05.2026 | 22:52
Իրանը չպետք է Հորմուզի նեղուցը, որը փակել է Մերձավոր Արևելքի պատերազմի սկզբից ի վեր, որպես Պարսից ծոցի երկրներին շանտաժի ենթարկելու միջոց օգտագործի, հայտարարել է Կատարի վարչապետ, ԱԳ նախարար Շեյխ Մոհամմեդ բին Աբդուլռահման ալ Թանին, գրում է Al Arabiya-ն։
Դոհայում Թուրքիայի արտգործնախարար Հաքան Ֆիդանի հետ մամուլի ասուլիսի ժամանակ նա ասել է, որ մտերիմ դաշնակիցներ են, որոնք դարձել են իրանա-ամերիկյան բանակցությունների հիմնական միջնորդները, ինչպես նաև Պակիստանը։
«Իրանը չպետք է այս նեղուցը օգտագործի որպես զենք՝ Պարսից ծոցի երկրների վրա ճնշում գործադրելու կամ նրանց շանտաժի ենթարկելու համար»,- ասել է կատարցի պաշտոնյան։
Ֆիդանը ևս ասել է, որ նեղուցը չպետք է «օգտագործվի որպես զենք»։
Պարսից ծոցի երկրները պատերազմի ընթացքում կրել են Իրանի հարձակումների հիմնական հարվածը, ընդ որում՝ Թեհրանը թիրախավորել է ոչ միայն ամերիկյան ակտիվները, այլև քաղաքացիական ենթակառուցվածքները, օդանավակայանները և էներգետիկ օբյեկտները։
Հորմուզի նեղուցի շրջափակումը, որով սովորաբար անցնում է աշխարհի նավթի և բնական գազի մոտ մեկ հինգերորդը, նույնպես դադարեցրել է էներգակիրներով հարուստ Պարսից ծոցի համար կարևոր ծովային արտահանումը՝ լարվածություն ստեղծելով նրանց տնտեսությունների համար։
Ընդգծելով Կատարի աճող դերը խաղաղության բանակցություններում՝ ալ Թանին ասել է, որ վերջին օրերին Միացյալ Նահանգներ կատարած իր այցը նպատակ ուներ ամրապնդել պատերազմը դադարեցնելու միջնորդական ջանքերը։
«Այցը հիմնականում կենտրոնացած էր Պակիստանի դիվանագիտական ջանքերին աջակցելու և այդ ջանքերին դրական արձագանք ապահովելու վրա՝ հնարավորինս արագ լուծման հասնելու համար»,- ասել է նա։
Թարգմանությունը՝ Էմմա Չոբանյանի
