Քալիֆորնիայում քաղաքապետերից մեկը խոստովանել է, որ աշխատել է Չինաստանի համար որպես չգրանցված օտարերկրյա գործակալ

Լոս Անջելեսի շրջանի Արկադիայի քաղաքապետ Այլին Վանը համաձայնել է ընդունել իր մեղքը՝ Միացյալ Նահանգներում  Չինաստանի օգտին որպես չգրանցված օտարերկրյա գործակալ աշխատելու մեջ: Bloomberg-ը, դատարանի փաստաթղթերին հղում անելով, գրում է, որ Վանը խոստովանել է, որ Չինաստանի կառավարության պաշտոնյաների ցուցումով չինական կողմի օգտին քարոզչություն է հրապարակել, գրում է The Insider-ը։

58-ամյա Վանն Արկադիայի քաղաքապետի պաշտոնը զբաղեցրել է 2022 թվականից: Նա հրաժարական է տվել մայիսի 11-ին: Նրան սպառնում է մինչև 10 տարվա ազատազրկում:

X-ում հրապարակված ՀԴԲ-ի զեկույցում նշվում է, որ 2020-ի վերջից մինչև 2022 թվականը Վանը և մեկ այլ անձ զբաղվել են Չինաստանի շահերի առաջխաղացմամբ։ Մասնավորապես, սա ներառել է չինական քարոզչության տարածում U.S.News Center կայքի միջոցով, որը ներկայանում էր որպես ԱՄՆ-ում չինական համայնքի լրատվական աղբյուր։

Bloomberg-ը պարզաբանում է, որ հրապարակված նյութերի թվում կա մի հոդված, որը հերքում է Սինցզյանում ույղուրների հետապնդումները։ Այս սխեմայում ներգրավված երկրորդ անձն անցյալ աշնանը խոստովանել է իր մեղքը և արդեն կրում է չորս տարվա ազատազրկման պատիժը։

ՀԴԲ հակահետախուզության և լրտեսության տնօրեն Ռոման Ռոժավսկիի խոսքով՝ Վանի դեմ հարուցված գործը պետք է ծառայի որպես նախազգուշացում. «Մեր ժողովրդավարությանը ազդելու համար օտարերկրյա կառավարությունների անունից գործող անհատները կբացահայտվեն և պատասխանատվության կենթարկվեն»։

Թարգմանությունը՝ Էմմա Չոբանյանի