23.10.2026 | 23:15
«Մանկական Եվրատեսիլ»-ի քվեարկության առաջին փուլը կմեկնարկի այս գիշեր
ԱՄԷ-ն գաղտնի հարվածներ է հասցրել Իրանին. WSJ
Քաղաքականություն
12.05.2026 | 12:31
Արաբական Միացյալ Էմիրությունները (ԱՄԷ) հարվածներ է հասցրել Իրանին՝ ի պատասխան Իսլամական Հանրապետության հարձակումների, հաղորդել է The Wall Street Journal-ը՝ հղում անելով իրազեկ աղբյուրներին: Նշվում է, որ այս իրավիճակում երկիրը, որի վրա Իսլամական Հանրապետությունը բազմիցս հարձակվել է, կարծես, պատերազմի ակտիվ մասնակից է, գրում է DW-ի ռուսական ծառայությունը։
Աբու Դաբին դեռևս պաշտոնապես չի ընդունել Իրանի վրա հարձակումը: Միաժամանակ, ըստ Wall Street Journal-ի, ԱՄԷ-ի օդային հարվածներից մեկը հասցվել է ապրիլի սկզբին Պարսից ծոցի Լավան կղզում գտնվող նավթավերամշակման գործարանին: Մոտավորապես նույն ժամանակ ԱՄՆ նախագահ Դոնալդ Թրամփը հայտարարել էր Իրանի դեմ ԱՄՆ-Իսրայել պատերազմի հրադադարի մասին՝ դրա սկսվելուց շուրջ հինգ շաբաթ անց։
Այնուհետև Իրանը հայտարարել էր, որ Լավանի նավթավերամշակման գործարանը թշնամական հարված է ստացել, իսկ հետագայում մի շարք հրթիռային և անօդաչուների հարվածներ հասցրել ԱՄԷ-ին և Քուվեյթին, հիշեցնում են հրապարակման հեղինակները:
Աղբյուրներից մեկը հայտնել է, որ ԱՄՆ-ը դժգոհություն չի հայտնել Լավան կղզու վրա հարձակման վերաբերյալ, քանի որ Վաշինգտոնի կողմից հայտարարված հրադադարը դեռևս ուժի մեջ չի մտել: Միևնույն ժամանակ, ԱՄՆ-ը «հանգիստ ողջունել է» ԱՄԷ-ի և Պարսից ծոցի ցանկացած այլ պետության մասնակցությունը մարտական գործողություններին։
ԱՄԷ-ի արտաքին գործերի նախարարության խոսնակը հրաժարվել է մեկնաբանել Լավան կղզու վրա հարվածի մասին տեղեկությունը, սակայն մատնանշել է երկրի իշխանությունների նախկինում արված հայտարարությունները, որ Աբու Դաբին իրավունք ունի արձագանքել թշնամական գործողություններին, այդ թվում՝ ռազմական։
Պենտագոնը նույնպես հրաժարվել է մեկնաբանություն տալ։
Ըստ WSJ-ի հաշվարկների՝ պատերազմի սկսվելուց ի վեր Իրանը հարձակվել է ԱՄԷ-ի վրա, ընդհանուր առմամբ, 2800 անօդաչու թռչող սարքերով և հրթիռներով։ Սա ավելին է, քան որևէ այլ երկրի, այդ թվում՝ Իսրայելի վրա հարձակումները, նշվում է հրապարակման մեջ։
Այս հարձակումները լուրջ հարված են հասցրել ԱՄԷ-ի ավիափոխադրումների, զբոսաշրջության և անշարժ գույքի շուկաներին՝ հանգեցնելով ընկերություններում կրճատումների և ժամանակավորապես ազատումների ալիքի:
«Բացի այդ, այս հարձակումները հիմնարար փոփոխություն են առաջացրել երկրի ռազմավարական ուղղության մեջ. Իրանն այժմ դիտվում է որպես մեկուսացված պետություն, որը ձգտում է խաթարել ԱՄԷ-ի տնտեսական և սոցիալական մոդելը, որը հիմնված է օտարերկրյա տաղանդների ներգրավման և անվտանգության ու կայունության համբավի վրա»,- գրում է WSJ-ն՝ հղում անելով Պարսից ծոցի պաշտոնյաներին։:
Թարգմանությունը՝ Էմմա Չոբանյանի
