25.06.2026 | 10:33
Արտարժույթների փոխարժեքները՝ հունիսի 25-ի դրությամբ
Թրամփը հիասթափված է և լրջորեն դիտարկում է Իրանի դեմ ռազմական գործողությունները վերսկսելու հնարավորությունը. CNN
Քաղաքականություն
12.05.2026 | 11:28
ԱՄՆ նախագահ Դոնալդ Թրամփn ավելի ու ավելի է հիասթափվում պատերազմը դադարեցնելու բանակցությունների հետ կապված իրանցիների մոտեցումից, և որոշ օգնականներ ասում են, որ նա այժմ ավելի լուրջ է դիտարկում խոշոր մարտական գործողությունների վերսկսման հնարավորությունը, գրում է CNN-ը:
Թրամփին զայրացնում է, մասնավորապես, Հորմուզի նեղուցի շարունակական փակ լինելը, ինչպես նաև այն, որ Իրանի ղեկավարության մեջ տարաձայնություններ կան, որոնք խանգարում են միջուկային բանակցություններում առաջընթացին, հայտնել են քննարկումներին ծանոթ աղբյուրները: Իրանի վերջին արձագանքը, որը Թրամփը համարել է «լիովին անընդունելի» և «հիմար», մի շարք պաշտոնյաների ստիպել է կասկածի տակ դնել Թեհրանի պատրաստակամությունը լուրջ բանակցային դիրքորոշում ընդունելու հարցում:
Աղբյուրները նշել են, որ վարչակազմի ներսում կան տարբեր ճամբարներ, որոնք առաջարկում են առաջ շարժվելու այլընտրանքային ուղիներ: Որոշները, այդ թվում՝ Պենտագոնի պաշտոնյաները, կողմ են իրանցիներին բանակցությունների սեղանի շուրջ բերելու համար ավելի ագրեսիվ մոտեցմանը, ներառյալ՝ թիրախային հարվածները, որոնք, ըստ նրանց, ավելի կթուլացնեն Թեհրանի դիրքերը: Մյուսները, սակայն, պնդում են, որ դիվանագիտությանն արդար հնարավորություն տրվի, նշել են աղբյուրները:
Թրամփի շրջապատից շատերը ցանկանում են, որ պակիստանցի միջնորդները շատ ավելի անմիջական լինեն իրանցիների հետ շփումներում: Երկու աղբյուրների խոսքով՝ վարչակազմի որոշ պաշտոնյաներ նաև կարծում են, որ Պակիստանը հաճախ ԱՄՆ-ի հետ կիսվում է իրանական դիրքորոշման ավելի դրական տարբերակով, քան այն, ինչն արտացոլում է իրականությունը:
CNN-ը նշում է, որ տարածաշրջանի երկրների և Պակիստանի կողմից ինտենսիվ ճնշում է գործադրվում՝ իրանցիներին հասկացնելու, որ ԱՄՆ նախագահը հիասթափված է, և սա նրանց վերջին հնարավորությունն է լրջորեն զբաղվելու դիվանագիտությամբ, սակայն չի թվում, թե Իրանը լսում կամ որևէ մեկին լուրջ է ընդունում։
Հաղորդվում է, որ երկուշաբթի Թրամփը կրկին հանդիպել է իր ազգային անվտանգության թիմի հետ Սպիտակ տանը՝ հետագա քայլերի տարբերակները քննարկելու համար: Բանակցություններին ծանոթ աղբյուրները հայտնում են, որ առաջընթացի վերաբերյալ կարևոր որոշում, հավանաբար, չի կայացվի մինչև ԱՄՆ նախագահի՝ Չինաստան այցը, որը նախանշված է մայիսի 13-15-ին։
Թարգմանությունը՝ Էմմա Չոբանյանի
