Իրանի իշխանություններն ազատ են արձակել Նոբելյան մրցանակակիր Նարգիս Մոհամմադիին՝ առողջական վիճակի վատթարացման պատճառով

Իրանի իշխանությունները գրավի դիմաց ազատ են արձակել Նոբելյան մրցանակակիր, իրավապաշտպան Նարգիս Մոհամմադիին և ուղարկել բուժման, գրում է Current time ը։

Փաստաբան Շիրին Արդականին ասել է, որ Մոհամմադին շատ թույլ է, կորցրել է գրեթե 20 կիլոգրամ։

«Լուրջ բժշկական պատճառներով պատժի այս կասեցումը հնարավոր դարձավ համաշխարհային քաղաքացիական հասարակության և մարդու իրավունքների դիվանագիտության մոբիլիզացիայի շնորհիվ, որը ճնշում գործադրեց ռեժիմի վրա։ Այս մոբիլիզացիան պետք է շարունակվի՝ պահանջելով Նարգիս Մոհամմադիի դեմ մեղադրանքների չեղարկում և կամայականորեն կալանավորված բոլոր քաղբանտարկյալների ազատ արձակում։ Մենք կոչ ենք անում համաշխարհային դիվանագիտական ​​​​գործիչներին շարունակել ճնշում գործադրել Իրանի իշխանությունների վրա՝ երկրում շարունակվող մահապատիժները դադարեցնելու համար»,- նշել է փաստաբանը։

Ավելի վաղ հաղորդվել էր, որ իրավապաշտպանը բանտում երկու սրտի կաթված է ստացել և հոսպիտալացվել Զենջան քաղաքի հիվանդանոցում, որտեղ նա կրում էր պատիժը։

Նարգիզ Մոհամմադին հայտնի է Իրանում մահապատժի, պարտադիր հիջաբի և կանանց իրավունքների սահմանափակումների քննադատությամբ։

2023 թվականին նա ստացել է Նոբելյան խաղաղության մրցանակ՝ «Իրանում կանանց ճնշման դեմ պայքարի և բոլորի համար մարդու իրավունքների ու ազատության խթանման» համար։ Արարողության ժամանակ մրցանակը նրա փոխարեն ստացել էին  նրա երեխաները, քանի որ նա բանտում էր։

Մարդու իրավունքների պաշտպանության ոլորտում գործունեության տարիների ընթացքում Մոհամմադին ձերբակալվել է 13 անգամ, նրա ընդհանուր պատիժը գերազանցել է 30 տարվա ազատազրկումը։

2024 թվականի դեկտեմբերին նա ժամանակավորապես ազատ էր արձակվել բժշկական պատճառներով։ 2026 թվականի փետրվարին, երկրում զանգվածային բողոքի ցույցերի ճնշումից հետո, դատարանը նրա ազատազրկման ժամկետին ավելացրեց ևս 7,5 տարի՝ «դավադրության և քարոզչության» մեղադրանքով։

Թարգմանությունը՝ Էմմա Չոբանյանի