Հանտավիրուսով վարակված զբոսանավից տարհանված Թուրքիայի 3 քաղաքացիներ մեկուսացվել են Ստամբուլում

MV Hondius զբոսանավից տարհանված Թուրքիայի երեք քաղաքացիներ գիշերը տեղափոխվել են Ստամբուլ և նախազգուշական միջոցառումների շրջանակում մեկուսացվել իրենց տներում, գրում է Turkish Minute-ը։

Նրանք տարհանվել են, երբ նավը կանգ է առել Իսպանիայի Կանարյան կղզիներում։ Մինչ օրս Թուրքիայի երեք քաղաքացիներից ոչ մեկի մոտ ախտանիշներ ի հայտ չեն եկել, սակայն նրանք կգտնվեն խիստ հսկողության տակ՝ նավի վրա վարակված մարդկանց հետ շփվելու կամ աղտոտված սնունդ օգտագործելու հավանականության պատճառով։

MV Hondius-ը հոլանդական զբոսանավ է, որն ապրիլի 1-ին մեկնել էր Արգենտինայի Ուշուայա քաղաքից և միջազգային առողջապահական գործողության կիզակետում հայտնվել այն բանից հետո, երբ մի քանի ուղևորների մոտ հանտավիրուս է հայտնաբերվել, հազվագյուտ հիվանդություն, որը սովորաբար մարդկանց է փոխանցվում վարակված կրծողների կամ նրանց մեզի, կղանքի կամ թքի հետ շփման միջոցով։

Առնվազն երեք ուղևոր՝ հոլանդացի զույգ և գերմանացի կին, մահացել են վարակի հետևանքով, մի քանիսի դեպքում էլ թեստի պատասխանը դրական է եղել։

Առողջապահության համաշխարհային կազմակերպությունը անցյալ շաբաթ հայտարարեց, որ գրանցվել է ութ դեպք, այդ թվում՝ երեք մահ, և որ ութից հինգը հաստատվել են որպես հանտավիրուս։ Հիվանդությունների կանխարգելման և վերահսկման եվրոպական կենտրոնն ավելի ուշ հայտարարեց, որ մայիսի 10-ի դրությամբ՝ հաստատվել է վեց դեպք։

Համաճարակը հատուկ մտահոգություն է առաջացրել, քանի որ նավի հետ կապված հիվանդների մոտ դրական թեստ է հանձնվել Անդերի շտամի նկատմամբ, որը հանտավիրուսի միակ հայտնի շտամն է, որը կարող է սահմանափակել մարդուց մարդ փոխանցումը սերտ և երկարատև շփման միջոցով։ ԱՀԿ-ն հանրային առողջության ընդհանուր ռիսկը գնահատել է որպես ցածր, բայց նշել է, որ վիրուսի ինկուբացիոն շրջանի պատճառով կարող են հայտնաբերվել լրացուցիչ դեպքեր։

Գրանադիլյա նավահանգիստ ժամանելուց հետո նավի ուղևորներն ու անձնակազմի անդամները զննում են անցել և փուլ առ փուլ տարհանվել։

Թարգմանությունը՝ Էմմա Չոբանյանի