28.09.2026 | 23:18
Հայաստանի մի շարք հասցեներում էլեկտրաէներգիայի անջատումներ կլինեն
Պեկինը հաստատել է՝ Դոնալդ Թրամփը մայիսի 13-15-ը պետական այց կկատարի Չինաստան
Քաղաքականություն
11.05.2026 | 13:48
ԱՄՆ նախագահ Դոնալդ Թրամփը մայիսի 13-ից 15-ը պետական այց կկատարի Չինաստան՝ նախագահ Սի Ցզինպինի հրավերով, հայտարարել է Չինաստանի արտաքին գործերի նախարարությունը, գրում է South China Morning Post-ը։
Սա կլինի ԱՄՆ նախագահի առաջին այցը Չինաստան գրեթե ինը տարվա ընթացքում և տեղի կունենա երկու երկրների միջև մի շարք հարցերի շուրջ լարվածության աճի ժամանակաշրջանում։ Այն նաև համընկնում է ԱՄՆ-Իրան փխրուն հրադադարի և Հորմուզի նեղուցի շրջափակման հետ, ինչը բարձրացնում է էներգակիրների գները և ծանրաբեռնում համաշխարհային տնտեսությունը։
Ավելի վաղ ԱՄՆ նախագահ մամուլի քարտուղարի տեղակալ Աննա Քելլին հայտարարել էր, որ Թրամփը չորեքշաբթի երեկոյան կժամանի Պեկին, ինչը նա նկարագրել է որպես «հսկայական խորհրդանշական այց»։ Նախատեսվում է Թրամփի հանդիպումը նախագահ Սի Ցզինպինի հետ, որին կհաջորդի այցելություն Երկնքի տաճար և պետական ճաշկերույթ։
Երկու կողմերն էլ կիրակի հայտարարել են, որ Չինաստանի փոխվարչապետ Հե Լիֆենգը մայիսի 12-ին և 13-ին կմեկնի Հարավային Կորեա՝ ԱՄՆ ֆինանսների նախարար Սքոթ Բեսենտի հետ առևտրային բանակցությունների համար, որը Թրամփի այցից առաջ բանակցությունների վերջին փուլն է։
Բանակցությունները «կուղղորդվեն երկու պետությունների ղեկավարների միջև Բուսանում կայացած հանդիպման և նախորդ հեռախոսազրույցների ժամանակ ձեռք բերված կարևոր կոնսենսուսի հիման վրա» և կքննարկեն «փոխադարձ հետաքրքրություն ներկայացնող տնտեսական և առևտրային հարցեր», ասվում է Չինաստանի Առևտրի նախարարության հայտարարության մեջ։
Աշխարհի երկու խոշորագույն տնտեսությունների միջև առևտրի և տեխնոլոգիաների շուրջ լարվածությունը կրկին սրվել է վերջին մի քանի օրերի ընթացքում՝ Սի Ցզինպինի և Թրամփի հանդիպման նախօրեին, իսկ Պեկինի և Թեհրանի միջև կապերը դարձել են կենտրոնական թեմա՝ Իրանի դեմ ուղղված ԱՄՆ-Իսրայել հակամարտության պատճառով, որը ձգվում է ավելի քան երկու ամիս։
Անցած ուրբաթ ԱՄՆ-ը պատժամիջոցներ էր կիրառել մայրցամաքային Չինաստանի և Հոնկոնգի ինը ընկերությունների ու անհատների նկատմամբ՝ նրանց մեղադրելով Իրանի զինված ուժերին օգնելու մեջ։
Թարգմանությունը՝ Էմմա Չոբանյանի
