Իրանի պատերազմը «դեռ չի ավարտվել, ուրանը պետք է դուրս բերվի». Նեթանյահու

Իրանի հարստացված ուրանի պաշարները պետք է «դուրս բերվեն»՝ նախքան Թեհրանի դեմ ԱՄՆ-Իսրայել պատերազմը ավարտված համարելը, հայտարարել է Իսրայելի վարչապետ Բենիամին Նեթանյահուն, գրում է France 24-ը։

«Ամեն ինչ դեռ չի ավարտվել, քանի որ դեռևս կա միջուկային նյութ՝ հարստացված ուրան, որը պետք է դուրս բերվի Իրանից։ Դեռ կան հարստացման կայաններ, որոնք պետք է ապամոնտաժվեն»,- ասել է Նեթանյահուն ամերիկյան CBS News-ին տված հարցազրույցում։

Նրա պնդմամբ՝ ԱՄՆ նախագահ Դոնալդ Թրամփը նմանատիպ դիրքորոշում ունի․ «Ես չեմ խոսելու ռազմական միջոցների մասին, այլ նախագահի, այն մասին, թե ինչ է ինձ ասել նախագահ Թրամփը. «Ես ուզում եմ այնտեղ գնալ»»։

Այնուամենայնիվ, Նեթանյահուի հայտարարությունը հակասում էր Թրամփի հրապարակային դիրքորոշմանը։ Նա պնդում է, որ Թեհրանի միջուկային ծրագիրը զսպված է։

Թրամփը հայտարարել է, որ Իրանը «ռազմական պարտություն է կրել» և պնդել, որ ուրանը կարող է դուրս բերվել, «երբ մենք ցանկանանք»։

«Մենք դա կստանանք որոշ պահի, երբ ցանկանանք։ Մենք կհսկենք այն։ Եթե որևէ մեկը մոտենա այդ վայրին, մենք կիմանանք այդ մասին և կպայթեցնենք նրանց», – ասել է նա հեռուստալրագրող Շարիլ Աթքիսոնի հետ զրույցում։

CBS-ի հարցին՝ ինչպես կարելի է ուրանի պաշարները դուրս բերել Իրանից, Նեթանյահուն պատասխանել է, որ կնախընտրեր համաձայնագիր կնքել. «Կարծում եմ՝ դա կարելի է անել ֆիզիկապես։ Խնդիրը դա չէ։ Եթե համաձայնագիր ունեք, մտնում եք ու դուրս բերում այն, ինչո՞ւ ոչ։ Դա լավագույն ճանապարհն է»։

Ինչ վերաբերում է ԱՄՆ-Իսրայել հարաբերություններին, Իսրայելը մնում է Ամերիկայի նվիրված դաշնակիցը, սակայն Նեթանյահուն հայտնել է՝ Դոնալդ Թրամփին ասել է, որ ցանկանում է հասնել ամերիկյան ռազմական օգնությունից հրաժարվելուն, որոնք ներկայում կազմում են տարեկան շուրջ 3,8 միլիարդ դոլար։

«Կարծում եմ՝ ժամանակն է, որ մենք հրաժարվենք Պենտագոնի մնացած ռազմական աջակցությունից։ Եկեք սկսենք հիմա և անենք դա հաջորդ տասնամյակի ընթացքում»,- հայտարարել է Նեթանյահուն։

Թարգմանությունը՝ Էմմա Չոբանյանի