26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Turkish Airlines-ի ինքնաթիռը Նեպալում վայրէջքի ժամանակ հրդեհվել է. ՏԵՍԱՆՅՈՒԹ
Քաղաքականություն
11.05.2026 | 11:40
Նեպալի մայրաքաղաք Կատմանդուի օդանավակայանում «Turkish Airlines» ավիաընկերության ինքնաթիռը, որը տեղափոխում էր 277 ուղևորի և անձնակազմի 11 անդամի, հրդեհվել է։ Պատահարի հետևանքով ոչ ոք չի տուժել, գրում է Turkish Minute-ը։
Նեպալի քաղաքացիական ավիացիայի վարչության խոսնակ Գյանենդրա Բհուլի խոսքով՝ Ստամբուլից մեկնած ինքնաթիռը հրդեհվել է վայրէջքի ժամանակ։
«Բոլոր ուղևորներն անվտանգ են, փրկարարական աշխատանքներն ավարտվել են։ Մենք այժմ հետաքննում ենք վթարը»,- AFP-ին ասել է Բհուլը։
Նա նշել է, որ միջադեպի պատճառով օդանավակայանի միակ թռիչքուղին փակվել է գրեթե երկու ժամով, սակայն հետագայում վերաբացվել է։
Հիմալայան այս երկիրն աշխարհի ամենահեռավոր և դժվարամատչելի թռիչքուղիներից մի քանիսի հայրենիքն է, որոնք շրջապատված են ձյունածածկ գագաթներով և տեղանքով։ Սա մարտահրավեր է ներկայացնում նույնիսկ փորձառու օդաչուների համար։
Ավիավթարների շարքը, ինչպես նաև Եվրամիության կողմից Նեպալի բոլոր ավիաընկերությունները սև ցուցակում ներառելու որոշումը անցյալ տարի կառավարության պաշտոնյաներին դրդել էին հայտարարել նոր ռադարային և եղանակի մոնիթորինգի համակարգեր տեղադրելու ծրագրերի մասին։
2015 թվականին «Turkish Airlines» ընկերության 224 ուղևոր տեղափոխող ինքնաթիռը դուրս էր եկել Կատմանդուի թռիչքուղուց։ Ուղևորները չէին տուժել, սակայն վթարի հետևանքով թռիչքուղին չորս օրով փակվել էր, չեղարկվել էին բազմաթիվ միջազգային չվերթներ։
Թարգմանությունը՝ Էմմա Չոբանյանի
