Թրամփը հայտարարել է Ռուսաստանի և Ուկրաինայի միջև եռօրյա հրադադարի և գերիների փոխանակման մասին

ԱՄՆ նախագահ Դոնալդ Թրամփը հայտարարել է, որ Ռուսաստանի և Ուկրաինայի միջև ձեռք է բերվել եռօրյա հրադադարի պայմանավորվածություն։ Նրա խոսքով՝ կրակի դադարեցման ռեժիմը գործելու է մայիսի 9-ին, 10-ին և 11-ին։

Թրամփը Truth Social սոցիալական հարթակում գրել է, որ Ռուսաստանում այդ օրերին նշվում է Հաղթանակի օրը, սակայն այդ ամսաթիվը կարևոր նշանակություն ունի նաև Ուկրաինայի համար, քանի որ երկիրը նույնպես մեծ դեր է ունեցել Երկրորդ համաշխարհային պատերազմում։

ԱՄՆ նախագահի հայտարարության համաձայն՝ հրադադարը նախատեսում է ռազմական գործողությունների ամբողջական դադարեցում, ինչպես նաև գերիների փոխանակում «1000-ը՝ 1000-ի դիմաց» ձևաչափով։ Թրամփի պնդմամբ՝ նախաձեռնությունը ներկայացրել է անձամբ ինքը, իսկ դրան համաձայնել են Ռուսաստանի նախագահ Վլադիմիր Պուտինը և Ուկրաինայի նախագահ Վլադիմիր Զելենսկին։

Թրամփը հույս է հայտնել, որ ձեռք բերված համաձայնությունը կարող է քայլ դառնալ պատերազմի ավարտի ուղղությամբ։ Նրա խոսքով՝ ամբողջական խաղաղության շուրջ բանակցությունները շարունակվում են, և կողմերը «ավելի ու ավելի են մոտենում» համաձայնության։

Ուկրաինան և Ռուսաստանը ևս հաստատել են եռօրյա հրադադարի և գերիների փոխանակման պայմանավորվածությունը։ Ուկրաինայի նախագահ Զելենսկին սոցիալական ցանցերում գրել է, որ «մայիսի 9-ին, 10-ին և 11-ին պետք է հաստատվի լռության ռեժիմ»՝ միաժամանակ հաստատելով գերիների փոխանակման մասին տեղեկությունը։

ՌԴ նախագահի օգնական Յուրի Ուշակովը հայտարարել է, որ ռուսական կողմը ընդունելի է համարում ԱՄՆ նախագահի առաջարկած նախաձեռնությունը և ևս մեկ անգամ հաստատել է գերիների փոխանակումը «1000-ը՝ 1000-ի դիմաց» սկզբունքով։

Ուկրաինայի նախագահ Վլադիմիր Զելենսկին հայտարարել է, որ Կիևը պատրաստ է պահպանել այն եռօրյա հրադադարը։

Զելենսկին միաժամանակ հաստատել է նաև գերիների լայնածավալ փոխանակման նախապատրաստումը՝ «1000-ը՝ 1000-ի դիմաց» ձևաչափով։

Նրա խոսքով՝ Ուկրաինան գործելու է փոխադարձության սկզբունքով․ եթե Ռուսաստանը իսկապես դադարեցնի կրակը, Կիևը նույնպես կպահպանի հրադադարը։

Ուկրաինայի նախագահը շնորհակալություն է հայտնել Թրամփին բանակցային գործընթացին մասնակցելու համար և հույս է հայտնել, որ Միացյալ Նահանգները կկարողանա ապահովել հրադադարի պահպանումը Մոսկվայի կողմից։