07.08.2026 | 13:50
«Ծաղկաձորում մարզվելը հիանալի է»․ Արման Ծառուկյան
Մայիսի 28-ին զենք ցույց տալը շոուի համար լավ կլինի, բայց երբ Ադրբեջանը զենք է գնում, նաև դրա գործարան է կառուցում, վերանորոգում․ Թևան Պողոսյան․ ՏԵՍԱՆՅՈՒԹ
Քաղաքականություն
08.05.2026 | 20:30
Հայաստանում մեկնարկած խորհրդարանական ընտրությունների քարոզարշավը, ըստ քաղաքագետ Թևան Պողոսյանի, աչքի է ընկնում «ժողովրդավարության նվազումով և ռեպրեսիաների սաստկացումով»։ Նրա գնահատմամբ՝ ներկայիս ընտրապայքարը զուրկ է գաղափարական բովանդակությունից և վերածվել է իշխանությունը պահպանելու պայքարի։
Factor TV-ի հետ զրույցում անդրադառնալով նախընտրական քարոզարշավին՝ Պողոսյանը նշում է, որ այն մեկնարկել է ոչ թե պաշտոնական օրվանից, այլ շատ ավելի վաղ՝ ուղեկցվելով քաղաքական հետապնդումներով։
«Ամենացայտուն բաղադրիչը դա ռեպրեսիաների շարքն է։ 2021-ին ոչ մի սրբազան նստեցված չէր, ոչ մի քաղաքական գործիչներ առանց հիմնավորման ամիսներով նստած չէին, տնային կալանքների շարքը այսքան չէր։ Իշխանությունը Գյումրիից հետո հետևություն արեց, որ ռեպրեսիաները պետք է խստացնի»,- ասում է քաղաքագետը։
Ըստ Պողոսյանի՝ իշխանության կողմից առաջ քաշվող օրակարգը զուրկ է ինքնուրույն գաղափարներից և սպասարկում է այլ շահեր։ «Իշխանության կողմից՝ աթոռ պահելու։ Զրո գաղափար, ի՞նչ գաղափար։ Այդ գաղափարները Ալիևի գրած տեքստն է։ Ինչքան իրենք ասեն՝ կապ չունի սահմանադրությունը, բոլորս գիտենք արդեն ամիսներ է, տարիներ է, էլ չգիտեմ Ալիևը ոնց պետք է հայտարարի, որ փորձեն այդ բառն այդպես չօգտագործել»։
Խոսելով խաղաղության թեմայի շուրջ տարբեր մոտեցումների մասին՝ նա ընդգծում է, որ իրական խաղաղությունը չի կարող հիմնվել սեփական իրավունքներից հրաժարվելու վրա։
«Ի՞նչ է խաղաղությունը, մինչև չձևակերպես, ես չեմ կարողանալու ասել՝ դուք ինչ եք ուզում։ Երբ որ քեզ մեկն ասում է՝ իրավունք չունես որևէ մեկի իրավունքը բարձրացնես, ուրեմն ինքը արդեն քեզ հետ խաղաղություն չի ցանկանում։ Քեզ մի բանից զրկելու մեջ խաղաղություն որտե՞ղ կա։ Այն էլ իրավունքի, այն էլ, որ քոնն է, այն էլ Աստծուց»,- նշում է Պողոսյանը։
Քաղաքագետի դիտարկմամբ՝ խաղաղությունը պետք է պարտադրել սեփական ուժով՝ գիտությամբ, տնտեսությամբ և հզոր բանակով, այլ ոչ թե զիջումներով։ «Պարտադրանք բառը, դա չի, որ դու քանակով ավելի շատ ես։ Թող հայը այնպիսի զենք-զինամթերք ունենա, որ նույն Թուրքիան ու Ադրբեջանը ասեն՝ ախպեր, գործ չունեմ, չհարձակվեմ»։
Պողոսյանի համոզմամբ՝ ընտրություն կատարելիս քաղաքացին կանգնած է երկու հիմնական մոտեցման առջև՝ կողմնորոշվել սեփական անձնական, կարճաժամկետ շահով, թե՞ առաջնորդվել ազգային, հեռահար նպատակներով ու արժեքներով։
Նա կարծում է, որ «չկողմնորոշված» ընտրող հասկացությունը մոլորություն է, քանի որ յուրաքանչյուր մարդ իրականում ունի իր արժեքային համակարգը և նախասիրությունները, անկախ նրանից՝ բարձրաձայնում է դրանք, թե ոչ։ «Չկա չկողմնորոշված։ Հարցն այն է՝ ի՞նչի համար ես դու պետք է կողմնորոշվես։ Դու սկզբից այսպես թե այնպես կողմնորոշված ես՝ քո դաստիարակությամբ, քո կրթությամբ, քո ինչ-որ բանով»։
Հարցազրույցն ամբողջությամբ՝ տեսանյութում։
Ռոբերտ Անանյան
