Իրանն ԱՄՆ-ին մեղադրել է հրադադարի ռեժիմը խախտելու մեջ

Իրանի Զինված ուժերը հայտարարել են, որ թիրախավորել են ԱՄՆ ռազմածովային ուժերի երեք նավերը՝ ի պատասխան ԱՄՆ-ի կողմից Իրանի ափամերձ ջրերից դեպի Հորմուզի նեղուց ուղևորվող իրանական նավթատար լցանավի հարձակման։ Այս մասին հայտնել է կառավարամետ Press TV-ն՝ վկայակոչելով Իրանի «Խաթամ ​​ալ-Անբիա» կենտրոնական շտաբի խոսնակին, փոխանցում է DW-ն։

Նշվում է նաև, որ որոշ տարածաշրջանային երկրների հետ համագործակցությամբ օդային հարձակումներ են իրականացվել Բանդար Խամիրի, Սիրիկի և Քեշմ կղզու ափերի երկայնքով գտնվող քաղաքացիական տարածքների վրա։

Գերմանական dpa գործակալության փոխանցմամբ՝ իրանական լրատվամիջոցներն ավելի վաղ ենթադրություններ էին արել Արաբական Միացյալ Էմիրությունների կողմից հնարավոր ավիահարվածի մասին։

Իրանական Tasnim լրատվական գործակալությունը գրել է.

«Եթե այս տեղեկությունը հաստատվի, Էմիրությունները կվճարեն իրենց թշնամական գործողությունների համար»,- ըստ dpa-ի՝ գրել է իրանական Tasnim լրատվական գործակալությունը։

Այս շաբաթվա սկզբին ԱՄԷ-ն Իրանին մեղադրել էր իր նավթագազային օբյեկտներին հրթիռներով և անօդաչու թռչող սարքերով հարվածելու մեջ։ Այսօր էլ Արաբական Միացյալ Էմիրությունները հայտարարել է, որ իրենց ՀՕՊ-ն «ակտիվորեն հակազդում է Իրանից եկող հրթիռային և անօդաչու թռչող սարքերի հարձակումներին»։

«Պաշտպանության նախարարությունը հաստատում է, որ երկրի տարբեր մասերում լսվող ձայները ԱՄԷ-ի հակաօդային պաշտպանության համակարգերի կողմից բալիստիկ, թևավոր հրթիռների և անօդաչու թռչող սարքերի որսման արդյունք են»,- ասվում է X-ում հրապարակված հայտարարության մեջ։

Թարգմանությունը՝ Էմմա Չոբանյանի