ԱՄՆ Սենատի կողմից ընդունված բանաձևում հիշատակվել են նաև Ադրբեջանում բանտարկված լրագրողները

ԱՄՆ Սենատը մայիսի 3-ի Մամուլի ազատության համաշխարհային օրվա կապակցությամբ բանաձև է ընդունել։ Ադրբեջանական լրատվամիջոցների հաղորդմամբ՝ դրանում հիշատակվում են նաև Ադրբեջանում բանտարկված «AbzasMedia»-ի գլխավոր խմբագիր Սևինջ Վագիֆքըզիի և «Ազատություն» ռադիոկայանի լրագրող Ֆարիդ Մեհրալիզադեի անունները։

Բանաձևը ճանաչում է ամբողջ աշխարհում խոսքի ազատության և մամուլի նկատմամբ աճող սպառնալիքները՝ դա համարելով լուրջ խնդիր։ Փաստաթղթում նաև նշվում է, որ լրագրողներն ամբողջ աշխարհում բախվում են աճող սպառնալիքների, ընդգծվում է, որ հակամարտության գոտիներում և ավտորիտար ռեժիմներում աշխատող լրատվամիջոցների ներկայացուցիչները, մասնավորապես, բախվում են բռնության, ճնշման, բանտարկության և մահվան վտանգի։

Նշվում է նաև, որ վերջին տարիներին հարյուրավոր լրագրողներ ձերբակալվել կամ հետապնդվել են, ինչը վկայում է մամուլի ազատության ոլորտում իրավիճակի վատթարացման մասին։

Սենատը փաստաթղթում վերահաստատել է, որ ազատ և անկախ լրատվամիջոցները կենսական նշանակություն ունեն ժողովրդավարական հասարակության համար։ Նշվել է, որ լրագրողները կարևոր դեր են խաղում հասարակությանը ճշգրիտ և օբյեկտիվ տեղեկատվություն տրամադրելու գործում, և որ մամուլի ազատությունը լավ կառավարման և մարդու իրավունքների հիմնական տարրերից մեկն է։ Բանաձևը կոչ է անում աջակցել մամուլի ազատության պաշտպանությանը ինչպես Միացյալ Նահանգներում, այնպես էլ միջազգային մակարդակով և խստորեն դատապարտել լրագրողների վրա հարձակումները։

Նշենք, որ Ադրբեջանում ներկայում բանտերում շուրջ 30 լրագրող կա։ Անկախ լրատվամիջոցների դեմ ճնշումները սկսվել են 2023 թվականին՝ «AbzasMedia»-ի լրագրողների ձերբակալությամբ։ 2023 թվականի նոյեմբերից ձերբակալվել են «AbzasMedia»-ի տնօրեն Ուլվի Հասանլին, գլխավոր խմբագիր Սևինջ Վագիֆքիզին, նախագծի համակարգող Մահամմադ Կեկալովը, հետաքննող լրագրող Հաֆիզ Բաբալին, լրագրողներ Էլնարա Գասիմովան և Նարգիզ Աբսալամովան, ինչպես նաև «Ազատ Եվրոպա/Ազատություն» ռադիոկայանի աշխատակից և տնտեսագետ Ֆարիդ Մեհրալիզադեն։

2025 թվականի հունիսի 20-ին, Բաքվի ծանր հանցագործությունների դատարանը Ուլվի Հասանլին, Սևինջ Վագիֆքըիզիին, Հաֆիզ Բաբալին և Ֆարիդ Մեհրալիզադեն դատապարտվեց 9 տարվա, Նարգիզ Աբսալամովային և Էլնարա Գասիմովային՝ 8 տարվա, իսկ Մահամմադ Կեկալովին՝ 7 տարի 6 ամսվա ազատազրկման։

Ավելի ուշ ձերբակալվեցին Toplum TV-ի և Meydan TV-ի լրագրողները։ Նրանց դատավարությունները ներկայում շարունակվում են։

Թարգմանությունը՝ Էմմա Չոբանյանի