Մարկո Ռուբիոն Վատիկանում հանդիպել է Հռոմի պապին՝ Թրամփի քննադատությունների ֆոնին

ԱՄՆ պետքարտուղար Մարկո Ռուբիոն Վատիկանում հանդիպել է Հռոմի պապ Լևոնի հետ՝ վերջինի և ԱՄՆ նախագահ Դոնալդ Թրամփի միջև լարվածության ֆոնին։ DW-ի հաղորդմամբ՝ Ռուբիոն շուրջ երկուսուկես ժամ անցկացրել է Վատիկանում՝ նախ հանդիպելով Հռոմի պապին, ապա բանակցություններ վարելով Վատիկանի բարձրաստիճան պաշտոնյաների, այդ թվում՝ կարդինալ Պիետրո Պարոլինի հետ։

Ռուբիոն Վատիկանում քննարկել է «Մերձավոր Արևելքում կայուն խաղաղության հասնելու ջանքերը», որոնք ուղղված էին լարվածության թուլացմանը։

ԱՄՆ Պետքարտուղարության խոսնակ Թոմի Փիգոտը հայտարարել է, որ Ռուբիոն և Լեոն քննարկել են Մերձավոր Արևելքում տիրող իրավիճակը «և Արևմտյան կիսագնդում փոխադարձ հետաքրքրություն ներկայացնող թեմաներ: Հանդիպումն ընդգծել է Միացյալ Նահանգների և Սուրբ Աթոռի միջև ամուր հարաբերությունները և խաղաղությունն ու մարդկային արժանապատվությունը խթանելու նրանց համատեղ հանձնառությունը», ասել է նա։

Ռուբիոն փորձել է մեղմացնել Թրամփի և Հռոմի պապի միջև եղած տարաձայնությունները՝ նախքան Կաթոլիկ եկեղեցու առաջնորդի հետ հանդիպումը։ Երեքշաբթի լրագրողների հետ զրույցում նա ասել էր, որ այցը ծրագրվել է՝ նախքան Թրամփը Իրանի պատերազմը քննադատելու համար կհարձակվեր Հռոմի պապի վրա։

«Ակնհայտ է, որ մենք ունեցել ենք որոշ բաներ, որոնք տեղի են ունեցել… Վատիկանի հետ շատ բան կա քննարկելու»,- լրագրողներին ասել է Ռուբիոն։

«Կարծում եմ՝ մենք կխոսենք վերջին օրերին տեղի ունեցած ամեն ինչի մասին, մենք չենք կարող խուսափել այս թեմաներին անդրադառնալուց։ Մենք կլսենք նրան»,- իր հերթին ասել է կարդինալ Պարոլինը՝ ընդգծելով, որ հանդիպումը նախաձեռնել է Վաշինգտոնը։

Լևոն XIV-ը ԱՄՆ-ից առաջին Հռոմի պապն է։ Նա զայրացրել է Թրամփին՝ դառնալով Իրանի պատերազմի և ԱՄՆ գործող վարչակազմի կոշտ հակամիգրացիոն քաղաքականության ականավոր քննադատ։

Ապրիլի սկզբին Թրամփը պնդում էր, որ Լևոնը «Վատիկանում չէր լինի», եթե ինքը նախագահ չլիներ, այն բանից հետո, երբ Հռոմի պապը հայտարարության մեջ ասել էր, որ «ոչ մի պատճառ չի կարող արդարացնել անմեղ արյուն թափելը»։

Թարգմանությունը՝ Էմմա Չոբանյանի