06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Բրյանսկում ուկրաինական հարձակման հետևանքով 13 մարդ է վիրավորվել
Քաղաքականություն
07.05.2026 | 14:31
Ուկրաինան մայիսի լույս 7-ի գիշերը հարվածել է Բրյանսկին, որի հետևանքով քաղաքի Բեժիցկի շրջանում վիրավորվել է 13 մարդ, այդ թվում՝ մեկ երեխա, հայտնում է նահանգապետ Ալեքսանդր Բոգոմազը։ Վիրավորները տեղափոխվել են հիվանդանոց, ասել է նա, գրում է Meduza-ն։
Բոգոմազը պնդում է, որ հարվածի թիրախը բնակելի շենքերն են եղել։ Նա ասել է, որ վնասվել են երկու բազմաբնակարան շենքեր, ավելի քան 20 բնակարաններ և 40 մեքենա։ Ավելի ուշ նա հայտնել է, որ ՀՕՊ ուժերը գիշերը Բրյանսկի մարզում ոչնչացրել են ուկրաինական 121 անօդաչու թռչող սարք։
Սամարայի մարզում մայիսի լույս 7-ի գիշերը հրթիռային տագնապ է հայտարարվել, ինչի հետևանքով քաղաքում դադարեցվել է հասարակական տրանսպորտի գործունեությունը, հայտարարել է Սամարայի քաղաքապետ Իվան Նոսկովը։ Նա հավելել է, որ մետրոն աշխատում է, իսկ տեղում ապաստարաններում մուտքն ազատ է։ Դպրոց հաճախող երեխաները տեղափոխվել են ապաստարաններ, իսկ դպրոցների առաջին հերթափոխը տեղափոխվել է երկրորդի։
Ռուսաստանի Պաշտպանության նախարարությունը հայտարարել է, որ չորեքշաբթի ժամը 21:00-ից մինչև հինգշաբթի ժամը 07:00-ն ընկած ժամանակահատվածում ռուսական ուժերը խոցել են 347 ուկրաինական անօդաչու թռչող սարք։
Հայտարարությունից հետևում է, որ սա մարտի 25-ից ի վեր խոցված անօդաչուների ամենամեծ թիվն է, երբ ՊՆ-ն հայտնել էր 389 ԱԹՍ-ի ոչնչացման մասին։
Պաշտպանության նախարարության տվյալներով՝ ռուսական հակաօդային պաշտպանության համակարգերը որսացել են անօդաչու թռչող սարքեր ավելի քան 20 շրջաններում, ինչպես նաև Ազովի, Կասպից ու Սև ծովերի ջրերի վրա։
Թարգմանությունը՝ Էմմա Չոբանյանի
