Կանարյան կղզիներն արգելել է զբոսանավի մուտքը, որի վրա հանտավիրուսի բռնկում է գրանցվել. ուղևորներ են մահացել

Կանարյան կղզիների իշխանություններն արգելել են MV Hondius (IMO: 9818709) զբոսանավի մուտքը նավահանգիստ, որի վրա հանտավիրուսի բռնկում է հայտնաբերվել: Reuters-ի փոխանցմամբ՝ այս մասին հայտարարել է տարածաշրջանային կառավարության ղեկավար Ֆերնանդո Կլավիխոն, գրում է The Insider-ը։

Նա նշել է, որ Կանարյան կղզիների իշխանությունները «բավարար տեղեկատվություն չունեն [նավից եկող վտանգի մասին]՝ հանրությանը հանգստացնելու կամ նրանց անվտանգությունը երաշխավորելու համար»։ Կլավիխոն նաև ասել է, որ խնդրել է շտապ հանդիպում անցկացնել Իսպանիայի վարչապետ Պեդրո Սանչեսի հետ՝ հարցը քննարկելու համար։

Ավելի վաղ իսպանական պետական TVE հեռուստաալիքը հաղորդել էր, որ MV Hondius-ը ծրագրում էր կանգ առնել Թեներիֆե կղզում։ Իսպանիայի կառավարությունը նավին թույլատրել էրշ կանգառ կատարել, հաղորդում է Reuters-ը։

Մայիսի 6-ին Հարավաֆրիկյան Հանրապետության առողջապահության նախարարը երկրի խորհրդարանին տեղեկացրել էր, որ MV Hondius նավի երկու ուղևորների մոտ, որոնք ափ էին իջել Հարավաֆրիկյան նավահանգստում, հանտավիրուս է հայտնաբերվել։ ՀԱՀ-ում  անցկացված թեստերը ցույց են տվել, որ հոլանդացի և բրիտանացի քաղաքացիները վարակվել են հանտավիրուսի Անդեսի շտամով։ Կինը կարճ ժամանակ անց մահացել է, իսկ տղամարդը շարունակում է մնալ հիվանդանոցում։

«Սա միակ հայտնի շտամն է, որը փոխանցվում է մարդուց մարդ, սակայն փոխանցումը շատ հազվադեպ է և տեղի է ունենում միայն շատ սերտ շփման միջոցով»,- ասվում է ՀԱՀ-ի առողջապահության նախարարության զեկույցում։

Ավելի վաղ  հաղորդվել էր, որ MV Hondius-ի առնվազն երեք ուղևոր մահացել է։ Առաջին վարակված ուղևորը մահացել է ապրիլի 11-ին։

Հանտավիրուսի մյուս շտամները մարդկանց ամենից հաճախ փոխանցվում են վարակված կրծողների հետ շփման կամ նրանց մեզի, կղանքի կամ թքի միջոցով, սովորաբար՝ օդակաթիլային ճանապարհով։ Հանտավիրուսը կարող է առաջացնել վիրուսային հեմոռագիկ տենդեր, որոնք ուղեկցվում են արյան անոթների վնասմամբ, թունավորմամբ և արյունահոսությամբ։ Հանտավիրուսն ամենից հաճախ վնասում է թոքերը կամ երիկամները։

Թարգմանությունը՝ Էմմա Չոբանյանի