24.10.2026 | 20:51
Երևան-Աշտարակ ճանապարհին բախվել են Opel-ը և բեռնատարը․ կան զոհեր և տուժածներ
Իրանն ու ԱՄՆ-ը պատերազմի ավարտի 14 կետանոց համաձայնագիր են քննարկում. Axios
Քաղաքականություն
06.05.2026 | 16:05
Սպիտակ տունը, կարծես, հույս ունի, որ մոտ է Իրանի հետ պատերազմը շուտով ավարտելու համար որևէ համաձայնագրի կնքմանը։ Անանուն ամերիկացի պաշտոնյաների վկայակոչելով՝ Axios-ը հայտնել է, որ մեկ էջանոց փոխըմբռնման հուշագիրը (MOU) մշակման փուլում է, և որ ԱՄՆ-ն ակնկալում է Իրանի պատասխանը հիմնական կետերի վերաբերյալ 48 ժամվա ընթացքում, գրում է DW-ն։
Axios-ի աղբյուրը նշել է, որ ներկայիս ջանքերը պատերազմի սկսվելուց ի վեր երկու կողմերի միջև համաձայնության հասնելու ամենամոտ պահն են։
Հաղորդագրության համաձայն՝ 14 կետից բաղկացած MOU-ով կհայտարարվի պատերազմի պաշտոնական ավարտի մասին և կսկսվի 30-օրյա բանակցությունների շրջան, որի ընթացքում Իրանը կսկսի բացել Հորմուզի նեղուցը։ Փաստաթուղթը, ըստ որոշ տեղեկությունների, ներառում է նաև Իրանի միջուկային հարստացման մորատորիում։ Աղբյուրներն Axios-ին հայտնել են, որ դա կտևի առնվազն 12 տարի, որից հետո Իրանը կկարողանա ուրան հարստացնել, բայց միայն ցածր մակարդակով։
Իրանը նաև կպարտավորվի բաց լինել ՄԱԿ-ի ստուգումների համար։ Axios-ը նաև մեջբերել է աղբյուրների, ըստ որոնց՝ քննարկվում է նաև Իրանի ուրանի պաշարների տեղափոխման տարբերակը։
Ավելի ուշ Reuters-ը, վկայակոչելով պակիստանյան աղբյուրի, հաստատել է Axios-ի հաղորդումը։
«Մենք շատ շուտով կփակենք սա։ Մենք մոտենում ենք դրան»,- ասել է աղբյուրը։
Իրանի միջուկային ծրագիրը լուրջ խոչընդոտ է եղել երկու կողմերի համար։ Վաշինգտոնը հայտարարել է, որ Իրանը չի կարող պահել պաշարները, նախկինում էլ սպառնացել էր զորքեր ուղարկել՝ դրանք դուրս բերելու համար։ Թեհրանը պնդում է, որ չի ձգտում միջուկային զենք ստեղծել, միաժամանակ, պաշտպանում է քաղաքացիական միջուկային ծրագիր իրականացնելու իր իրավունքը։
Թարգմանությունը՝ Էմմա Չոբանյանի
