07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
ՀՀԿ կանանց կառույցի 10 տարվա ղեկավարը՝ Արամ Սարգսյանի եւ Խաչատուր Քոքոբելյանի «Մենք» դաշինքում
Քաղաքականություն
22.11.2018 | 14:04
ՀՀԿ կանանց կառույցի 10 տարվա ղեկավարը՝ Արամ Սարգսյանի եւ Խաչատուր Քոքոբելյանի «Մենք» դաշինքում
Ազգային ժողովի արտահերթ ընտրություններին ընդառաջ ճամբարափոխության դեպքերի պակաս չկա: Factor.am-ը տեղեկացավ, որ ՀՀԿ Գեղարքունիքի մարզի կանանց խորհրդի նախագահը հանգրվանել է «Մենք» դաշինքի ցուցակում:
Մալխասյանը ՀՀԿ կանանց խորհրդի ղեկավարն է 2008 թվականից: Սրան զուգահեռ նա զբաղեցնում է նաեւ Գավառի ՀՀԿ շրջանային կազմակերպության նախագահի տեղակալի պաշտոնը:
Մեր աղբյուրի փոխանցած տեղեկությունը ճշտելու նպատակով ուսումնասիրութուններ կատարեցինք «Հանրապետական» կուսակցության պաշտոնական կայքում եւ պարզեցինք, որ Էլեոնորա Մալխասյանը մինչ այս պահն էլ կայքում ներկայացված է որպես մարզի ՀՀԿ կանանց խորհրդի ղեկավար ու Գավառի տարածքային կառույցի փոխնախագահն է:
Նա 2006 թվականից առ այսօր զբաղեցնում է նաեւ Գավառի պետական երաժշտական քոլեջի տնօրենի պաշտոնը:
Էլեոնորա Մալխասյանը «Մենք» դաշինքի համամասնական ցուցակի 33-րդ համարն է: Հիշեցնենք, որ «Մենք» դաշինքը ձեւավորվել է «Հանրապետություն» եւ «Ազատ դեմոկրատներ» կուսակցությունների համագործակցությունից:
Մեր աղբյուրների փոխանցմամբ՝ Էլեոնորա Մալխասյանը իր շրջապատում հայտարարել է, թե ՀՀԿ-ում եղել է միայն այն պատճառով, որ «Երկրապահի» անդամ է եղել, իսկ «Երկրապահի» նախկին ղեկավար Մանվել Գրիգորյանն էլ ՀՀԿ-ի հետ է եղել: Այժմ արդեն այս կուսկացության հետ անելիք չունի:
Այս տեղեկությունների շուրջ Factor.am-ը զրուցեց «Ազատ Դեմոկրատներ» կուսակցության մամուլի խոսնակ Անժելա Խաչատրյանի հետ: Նա մեզ հետ զրույցում անդրադառնալով հարցին, թե ինչու՞ է ՀՀԿ կառույցի ղեկավարը տեղ գտել իրենց ցուցակում, արձագանքեց. «Ես չգիտեմ ում մասին եք խոսում»։
Երբ հստակեցրեցինք, որ խոսքը դաշինքի համապետական ցուցակի 33-րդ համարի թեկնածուի մասին է, Խաչատրյանն ասաց. «Կարողա մարդը նախկինում եղել է ՀՀԿ-ական, հիմա ի՞նչ խնդիր կա: Ես չեմ կարող մեկնաբանություն տալ»,- եզրափակեց նա:
Մենք փորձեցինք նաեւ ՀՀԿ կազմակերպչական հարցերով նախագահ Ռուբեն Թադեւոսյանից պարզել, արդյոք Էլեոնորա Մալխասյանը հեռացել է ՀՀԿ-ից, սակայն պարոն Թադեւոսյանը չցանկացավ մեր հարցի հետ կապված մեկնաբանություն տալ։
Ուշագրավն այն է նաեւ, որ Էլեոնորա Մալխասյանը, լինելով Գավառի պետական երաժշտական քոլեջի տնօրենը, հաշվառված է Երեւան քաղաքի Մամիկոնյանց փողոցում: Այս մասին տեղեկանում ենք ԿԸՀ պաշտոնական կայքից:
Հայկ Վարդանյան
