Չեբոքսարիում ուկրաինական ԱԹՍ-ն հարվածել է բնակելի շենքի․ վիրավորներ կան. ՏԵՍԱՆՅՈՒԹ

Չեբոքսարիում մայիսի 5-ի առավոտյան ուկրաինական անօդաչու թռչող սարքը հարվածել է բնակելի շենքի, հաղորդում են տելեգրամ ալիքները։ Շենքը հրդեհվել է, գրում է Meduza-ն։

Չուվաշիայի նախարարների կաբինետի ղեկավար Սերգեյ Արտամոնովը հայտնել է, որ Չեբոքսարիում վնասվել է մեկ շենք, մի քանի մարդ վիրավորվել է, նրանց վիճակը վերահսկվում է բժշկական անձնակազմի կողմից։ Նա չի նշել, թե ինչ շենքի մասին է։

Astra-ն հաղորդում է, որ հրդեհ է բռնկվել Լենինսկի Կոմսոմոլա փողոցում գտնվող բնակելի շենքում, որը գտնվում է «ВНИИР-Прогресс» պաշտպանական արդյունաբերության գործարանի մոտակայքում։

Baza ալիքը, որը սերտորեն կապված է անվտանգության ուժերի հետ, հաղորդում է, որ բազմահարկ շենքի վրա անօդաչու թռչող սարքի հարձակման հետևանքով մեկ մարդ զոհվել է, ևս 10 մարդ վիրավորվել է։

Չեբոքսարիում հասարակական տրանսպորտի երթևեկությունը դադարեցվել է անօդաչուների հարձակումների պատճառով։

«Քաղաքում ստեղծված իրավիճակի պատճառով և ձեր անվտանգությունն ապահովելու համար հասարակական տրանսպորտի երթևեկությունը ժամանակավորապես դադարեցվել է՝ անորոշ ժամանակով։ Խնդրում ենք ձեզ պահպանել հանգստություն, հնարավորության դեպքում մնալ տանը և հետևել պաշտոնական հաղորդագրություններին»,- հայտարարել է  տեղի տրանսպորտի նախարարությունը։

Ուկրաինական անօդաչու թռչող սարքերը Չեբոքսարիի վրա հարձակումներ են իրականացնում գիշերվանից։ Իշխանությունները հայտնել են երեք վիրավորի մասին։ Astra-ն և ուկրաինական Exilenova-ն հայտնել են, որ Ուկրաինայի զինված ուժերը հարձակվել են «ВНИИР-Прогресс» պաշտպանական ձեռնարկության վրա։

Թարգմանությունը՝ Էմմա Չոբանյանի