Ուկրաինայի ԶՈՒ-ն հարձակվել է Չեբոքսարիի պաշտպանական ձեռնարկության վրա

Ուկրաինական անօդաչու թռչող սարքերը մայիսի լույս 5-ի գիշերը հարձակվել են Չեբոքսարիի վրա։ Հարձակման հետևանքով երեք մարդ է վիրավորվել, հայտնել է Չուվաշիայի Առողջապահության նախարարությունը, գրում է Meduza-ն։

Վիրավորներից մեկը հոսպիտալացվել է միջին ծանրության վիճակում: Եվս երկու բնակիչներ ամբուլատոր բուժում են ստանում, պարզաբանել է նախարարությունը: Հաղորդվում է, որ հարձակման հետևանքով վնասվել է առևտրի կենտրոն:

Astra-ն, վերլուծելով սոցիալական ցանցերում հրապարակված տեսանյութերը, հանգել է եզրակացության, որ Ուկրաինայի ԶՈՒ թիրախում եղել է Չեբոքսարիի «ВНИИР-Прогресс» պաշտպանական ձեռնարկությունը, իսկ վնասված առևտրի կենտրոնը գտնվում է մոտակայքում: «ВНИИР-Прогресс»-ն արտադրում է «Կոմետա» նավիգացիոն մոդուլներ անօդաչու թռչող սարքերի, ինչպես նաև թևավոր և բալիստիկ հրթիռների համար:

Չուվաշիայի նահանգապետ Օլեգ Նիկոլաևն այսօր առավոտյան հայտնել է, որ Ուկրաինայի զինված ուժերը բազմիցս հարվածներ են հասցրել Չեբոքսարիին։

Անօդաչու թռչող սարքերի հարձակումների պատճառով Չուվաշիայի ուսումնական հաստատությունններն անցել են հեռավար ուսուցման։

Մայիսի լույս 5-ի գիշերը Խանտի-Մանսիյսկի ինքնավար շրջանում նույնպես հայտարարվել է հրթիռային տագնապ։ Զգուշացումը տևել է շուրջ 40 րոպե։ Նահանգապետ Ռուսլան Կուխարուկի տելեգրամ ալիքից դատելով՝ տարածաշրջանում նախկինում հրթիռային տագնապ երբեք չէր հայտարարվել։ Այն գտնվում է Ուկրաինայի սահմանից ավելի քան 2000 կիլոմետր հեռավորության վրա։

Astra-ն նշում է, որ մայիսի լույս 5-ի գիշերը հրթիռային տագնապ է հայտարարվել Ռուսաստանի 18 շրջաններում։

Ռուսաստանի ՊՆ-ն հայտնել է, որ ՀՕՊ ուժերը գիշերը Ռուսաստանի մարզերի և  բռնակցված Ղրիմի տարածքում խոցել են ուկրաինական 289 անօդաչու թռչող սարք։ Անօդաչուները ոչնչացվել են Բրյանսկի, Բելգորոդի, Վորոնեժի, Կուրսկի, Կալուգայի, Սմոլենսկի, Օրյոլի, Տվերի, Տուլայի, Ռյազանի, Պսկովի, Նովգորոդի, Լենինգրադի, Ռոստովի, Վոլգոգրադի մարզերի, Մոսկվայի մարզի, Ղրիմի, Թաթարստանի, Կրասնոդարի երկրամասի և Ազովի ծովի տարածքում։

Բացի այդ, Լենինգրադի մարզի նահանգապետ Ալեքսանդր Դրոզդենկոն հայտնել է, որ ԱԹՍ-ի հարձակումից հետո Կիրիշիի արդյունաբերական գոտում հրդեհ է բռնկվել։ Ավելի ուշ նա պարզաբանել է, որ հրդեհը տեղայնացվել է, այն մարելու աշխատանքները մոտենում են ավարտին։

Ըստ Դրոզդենկոյի՝ ուկրաինական բանակի հիմնական թիրախը «Սուրգուտնեֆտեգազ»-ի «Կիրիշինեֆտեորգսինթեզ» նավթավերամշակման գործարանն է եղել։

Թարգմանությունը՝ Էմմա Չոբանյանի