12.05.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Թուրքիայի ԱԳՆ աղբյուրները հերքել են տեղեկությունները, որ Հայաստանի հետ ցամաքային սահմանը կբացվի հունիսի 4-ին
Քաղաքականություն
04.05.2026 | 17:26
Թուրքիայի արտաքին գործերի նախարարության աղբյուրները հերքել են պնդումները, որ Թուրքիայի և Հայաստանի միջև ցամաքային սահմանը կբացվի հունիսի 4-ին՝ նշելով, որ դեռևս հստակ ժամանակացույց չկա: T24-ի հետ զրույցում աղբյուրներն ընդգծել են, որ Թուրքիայի և Հայաստանի միջև հարաբերությունների կարգավորման գործընթացը կարագանա Ադրբեջանի և Հայաստանի միջև խաղաղության համաձայնագրի ստորագրումից հետո։
T24-ը գրում է, որ կողմերը նախաստորագրել են խաղաղության համաձայնագիրը Վաշինգտոնում կայացած գագաթնաժողովում, սակայն այն դեռևս վերջնականապես չի ավարտվել։ Ադրբեջանը պահանջում է փոփոխություններ կատարել Հայաստանի Սահմանադրությունում համաձայնագրի ստորագրումից առաջ: Մինչդեռ ՀՀ վարչապետ Նիկոլ Փաշինյանը խոստացել է սահմանադրական փոփոխություններ, հունիսի 7-ի ընտրություններից հետո սպասվում է սահմանադրական հանրաքվեի անցկացում:
Նշվում է, որ Թուրքիան և Հայաստանը հարաբերությունների կարգավորման գործընթաց սկսեցին 2020 թվականի սեպտեմբերին՝ Լեռնային Ղարաբաղի երկրորդ պատերազմից հետո: Հատուկ ներկայացուցիչներ նշանակվեցին երկու կողմերից էլ, առաջին հանդիպումը տեղի ունեցավ Ռուսաստանի մայրաքաղաք Մոսկվայում 2022 թվականի հունվարին։
Հատուկ ներկայացուցիչների միջև հանդիպումների հինգերորդ փուլը տեղի է ունեցել Ալիջանի սահմանային անցակետում 2024 թվականի հուլիսի 30-ին։ Կարգավորման գործընթացի շարունակականության շրջանակում վստահության ամրապնդման միջոցառումները ներառում են երկու երկրների միջև ուղիղ չվերթների և օդային բեռնափոխադրումների մեկնարկը, որոշվել է երրորդ երկրների քաղաքացիների և դիվանագիտական անձնագրեր ունեցողների համար վերաբացել Ալիջանի սահմանային անցակետը, որը փակվել էր Թուրքիայի կողմից 1993 թվականին։
Թուրքիայի և Հայաստանի միջև Ալիջան-Մարգարա սահմանային անցակետը բացվել էր 2023 թվականին՝ փետրվարի 6-ի երկրաշարժերի ժամանակ Հայաստանից Թուրքիա մարդասիրական օգնության մատակարարումը հեշտացնելու համար։
Այժմ բոլորի հայացքը սևեռված է 33 տարի փակված սահմանի բացման ժամանակին, հատկապես, երբ մոտենում են հունիսի 7-ի ընտրությունները, որոնք շատ կարևոր ժամանակաշրջան են Հայաստանի համար, ասվում է հրապարակման մեջ։
Մինչ Երևանը հյուրընկալում է պատմականորեն կարևոր դիվանագիտական միջոցառում՝ Եվրոպական քաղաքական համայնքի 8-րդ գագաթնաժողովը, այսօր լրատվամիջոցներում տեղեկատվություն է հայտնվել, որ Թուրքիա-Հայաստան ցամաքային սահմանը կբացվի հունիսի 4-ին։ Սակայն ԱԳՆ աղբյուրները հերքել են այս պնդումը՝ նշելով, որ սահմանի բացման համար դեռևս ժամանակացույց չկա։
T24-ի հետ զրույցում նախարարության աղբյուրները հիշեցրել են, որ Հայաստանի և Թուրքիայի միջև «լիակատար կարգավորման» նպատակով չորս տարի շարունակվող գործընթացի շրջանակում մինչ օրս ձեռնարկվել են վստահության ամրապնդման բազմաթիվ միջոցառումներ՝ սկսած տրանսպորտից և մշակույթից մինչև առևտուր և կրթություն։
Ընդգծելով, որ սահմաններում նախապատրաստական աշխատանքներ են տարվում դրանք բացելու որոշման արագ իրականացման համար, նախարարության աղբյուրները նշել են. «Ադրբեջանի և Հայաստանի միջև խաղաղության համաձայնագրի ստորագրմամբ մեր երկրի կողմից Հայաստանի հետ վարվող գործընթացը թափ կստանա։ Հետևաբար, սահմանային անցակետերի բացման վերաբերյալ դեռևս ժամանակացույց չկա»։
Թարգմանությունը՝ Էմմա Չոբանյանի
