Էներգետիկան մեզ համար դարձել է փակուղային խնդիր, պետք է անկախ էներգիա ապահովենք․ ֆոն դեր Լեյեն․ ՏԵՍԱՆՅՈՒԹ

«Էներգետիկան մեզ համար դարձել է փակուղային խնդիր, եվրոպացիներիս համար պետք է անկախ էներգիա ապահովենք»,- այս մասին Երևանում անցկացվող Եվրոպական քաղաքական համայնքի 8-րդ գագաթնաժողովի ժամանակ ասաց Եվրոպական հանձնաժողովի նախագահ Ուրսուլա ֆոն դեր Լեյենը։

Նրա խոսքով՝ ներմուծվող հանածո վառելիքից կախվածությունը և համաշխարհային շուկայում գների տատանումները վնասում են Եվրոպայի մրցունակությանը։

«Մի կարևոր դաս ենք քաղել՝ ինչքան խոցելի ենք, երբ ունենք չափից շատ կախվածություն: Բայց մենք ունենք նաև ակտիվներ. մենք ակտիվներ ունենք Եվրոպական միությունում, դա այն էներգետիկան է, որը մենք ներսում ենք արտադրում: Դա վերականգնվող էներգետիկան է՝ հողմային, արևային, հիդրոէներգետիկա, գեոթերմալ, բիոզանգված և միջուկային: Եվ մենք պետք է մեր էներգետիկ կախվածությունը շատ ավելի հուսալի, շատ ավելի ամուր կապենք մեր ներքին արտադրության՝ ավելի էժան ու ավելի կանխատեսելի էներգիայի աղբյուրների հետ, որոնք մենք ունենք: Էներգետիկան մեզ համար կարևորագույն ուղղություն է, և այն պետք է շատ ավելի անկախ լինի»,- շեշետեց նա։

Ուրսուլա ֆոն դեր Լեյենը անդրադարձել է նաև անվտանգությանն ու պաշտպանությանը։

«Վերջին չորս տարում եթե մեկ նոր բան գիտակցեցինք, դա այն է, որ մենք պետք է կարողանանք ինքներս մեզ պաշտպանել: Բնական է, և հենց այս պատճառով էլ մենք մոտ 800 միլիարդ եվրո ենք հավաքագրելու մինչև 2030 թվականը, որպեսզի անվտանգության պաշտպանության ոլորտներում առկա մեր բացերը լրացնենք: Խիստ կարևոր է, որ ավելի անկախ լինենք այս ուղղությամբ և կարողանանք կանխարգելման արդյունավետ համակարգեր ունենալ, քանի որ հնարավոր ռազմական ագրեսիայի լավագույն կանխարգելման համակարգը դա արդյունավետ խափանումն է, արդյունավետ նախականխումն է»,- ընդգծեց Եվրոպական հանձնաժողովի նախագահը։

Մանրամասները՝ տեսանյութում։