Պուտինը մտահոգված է հնարավոր հեղաշրջմամբ կամ դավադրությամբ, անվտանգությունն ուժեղացվել է. եվրոպական հետախուզություն

«Важные истории»-ն հրապարակել է փաստաթուղթ, որը, ինչպես պնդում են, անանուն եվրոպական երկրի հետախուզական զեկույց է Կրեմլի ներսում Ռուսաստանում հնարավոր հեղաշրջման փորձի վերաբերյալ «մտահոգությունների» մասին: CNN-ը և այլ լրատվամիջոցներ նույնպես լուսաբանել են զեկույցը: Որպես աղբյուր նշվում է անանուն անձ, որը «պաշտոնական պաշտոն է զբաղեցնում եվրոպական երկրի կառավարությունում», գրում է Current time-ը:

Զեկույցում նշվում է, որ 2026 թվականի մարտի սկզբից «Կրեմլը և անձամբ Վլադիմիր Պուտինը մտահոգված են Ռուսաստանի նախագահի դեմ դավադրության կամ հեղաշրջման փորձի ռիսկով։ Նա հատկապես զգուշանում է ռուսական քաղաքական էլիտայի անդամների կողմից անօդաչու թռչող սարքերի օգտագործումից հնարավոր մահափորձի համար»։

CNN-ը զեկույցի ամենացնցող կողմն անվանում է նախկին պաշտպանության նախարար և Պուտինի վստահելի անձ Սերգեյ Շոյգուի կապը հեղաշրջման ռիսկի հետ, քանի որ նա, իբր, «պահպանում է զգալի ազդեցություն բարձրագույն ռազմական հրամանատարության վրա»։ Շոյգուն ՌԴ Անվտանգության խորհրդի ղեկավարն է 2024 թվականից։ Պաշտպանության նախարարի պաշտոնում նա քննադատության թիրախ էր դարձել «Վագներ» մասնավոր ռազմական կազմակերպության ղեկավար Եվգենի Պրիգոժինի կողմից, որը 2023 թվականի ամռանը հեղաշրջման փորձ էր կազմակերպել և հետագայում զոհվել ինքնաթիռի վթարի հետևանքով՝ անհասկանալի հանգամանքներում։

Պնդվում է, որ Շոյգուի նախկին տեղակալ Ռուսլան Ցալիկովի մարտի 5-ի ձերբակալությունը դիտվում է որպես «էլիտաների միջև լուռ համաձայնագրի խախտում», որը թուլացնում է Շոյգուին և մեծացնում նրան քրեական հետապնդման ենթարկելու հավանականությունը։

Սակայն CNN-ը նշում է, որ զեկույցը Շոյգուի վերաբերյալ մեղադրանքները հաստատող ապացույցներ չի ներկայացնում, և որ «հաշվի առնելով, որ զեկույցի հրապարակումը կարող է ուղղված լինել Կրեմլի անկայունացմանը, ուշագրավ է, որ եվրոպական հետախուզությունը կարող է միաժամանակ արդյունավետորեն զգուշացնել Կրեմլին հնարավոր հեղաշրջման մասին»։

Նշվում է նաև, թե Կրեմլը զգալիորեն ուժեղացրել է Պուտինի անձնական անվտանգությունը՝ տեղադրելով հսկողության համակարգեր նրա ամենամոտ գործընկերների տներում: Նախագահի հետ աշխատող խոհարարներին, թիկնապահներին և լուսանկարիչներին արգելվում է օգտվել հասարակական տրանսպորտից։ Կրեմլի առաջնորդին այցելողները պետք է անցնեն կրկնակի անվտանգության ստուգում, իսկ նրա մտերիմները կարող են օգտվել միայն ինտերնետ հասանելիություն չունեցող հեռախոսներից, շեշտվում է փաստաթղթում: Այս միջոցառումներից մի քանիսը ներդրվել են վերջին ամիսներին՝ դեկտեմբերին բարձրաստիճան գեներալի սպանությունից հետո, որը հակասություններ է առաջացրել Ռուսաստանի անվտանգության ծառայությունների բարձրագույն էշելոններում։

Նշվում է, որ «դրանք վկայում են Կրեմլի ներսում աճող անհանգստության մասին, քանի որ այն բախվում է ինչպես երկրի ներսում, այնպես էլ արտերկրում աճող մարտահրավերների, այդ թվում՝ տնտեսական դժվարությունների, այլախոհության աճող նշանների և Ուկրաինայում մարտադաշտում անհաջողությունների»։ Ռուսաստանի անվտանգության աշխատակիցները կտրուկ կրճատել են Պուտինի կողմից  պարբերաբար այցելվող վայրերի թիվը, նշվում է զեկույցում։ Նա և իր ընտանիքը դադարել են այցելել իրենց սովորական նստավայրերը Մոսկվայի մարզում և Վալդայում։

«Важные истории»-ն գրում է, որ կարող է անկախ կերպով հաստատել զեկույցի մի քանի կետեր. «Մի քանի աղբյուրներ նույնպես հաստատում են Պուտինի դավադրության կամ հեղաշրջման փորձի նկատմամբ աճող վախը»։

Մասնավորապես, ԱԴԾ-ի գործող աշխատակիցը հայտնել է, որ իր ստորաբաժանումը շատ ավելի դժվար է ստանում գաղտնալսման թույլտվություն, քանի որ «բոլոր սարքավորումները վերաուղղվել էին կառավարությանը և այլ պետական ​​​​մարմիններին գաղտնալսելուն»։«Важные истории»-ն նաև նշել է, որ այս տարի Պետդումայի ոչ մի պատգամավոր հրավեր չի ստացել Կարմիր հրապարակում Հաղթանակի օրվա շքերթին մասնակցելու համար։

Կրեմլը և Ռուսաստանի անվտանգության մարմինները դեռևս չեն մեկնաբանել զեկույցի բովանդակությունը։

Թարգմանությունը՝ Էմմա Չոբանյանի