25.06.2026 | 12:10
Մոսկվան Երևանից որոշման է սպասում ՀԱՊԿ-ի մասով // «Ուժեղ Հայաստան»-ը հավաքի կոչ է անում․ ԼՈՒՐԵՐ
Ուկրաինական ԱԹՍ-ն հարվածել է Մոսկվայի բարձրահարկ շենքին. այն Կրեմլից 10 կմ-ից պակաս հեռավորության վրա է
Քաղաքականություն
04.05.2026 | 12:03
Անօդաչու թռչող սարքը ՌԴ մայրաքաղաք Մոսկվայում հարվածել է «Дом на Мосфильмовской» բնակելի համալիրի շենքերից մեկին, հայտնել է քաղաքապետ Սերգեյ Սոբյանինը, գրում է Meduza-ն։
Այս համալիրը Կրեմլից 10 կիլոմետրից պակաս հեռավորության վրա է։
Սոբյանինի տեղեկացմամբ՝ տուժածներ չկան։ Նա հավելել է, որ ՀՕՊ ուժերը հետ են մղել Մոսկվայի ուղղությամբ թռչող երկու անօդաչուների հարձակումը։ Քաղաքապետը նշել է, որ մասնագետներն աշխատում են այն վայրում, որտեղ ընկել են բեկորները։
Ականատեսների խոսքով՝ անօդաչու թռչող սարքը հարվածել է շենքին տեղական ժամանակով 00:30-ին: Բնակիչները պատմել են, որ լսել են խուլ ձայն, որին հաջորդել է հրդեհային ազդանշանը: Baza տելեգրամ ալիքը հաղորդում է, որ շենքի ճակատային մասը վնասվել է, պատուհանները՝ կոտրվել: Բեկորներն ընկել են հարակից տարածքի վրա:
Ուկրաինական Exilenova+ տելեգրամ ալիքն էլ պնդում է, որ Մոսկվայում ընկած անօդաչուն «լիարժեք FP-1 հարձակողական անօդաչու թռչող սարք է»:
«Սա ուկրաինական հարձակողական անօդաչու թռչող սարքերի առաջին գրանցված ներկայությունն է Կրեմլի անմիջական մոտակայքում շատ երկար ժամանակ անց»,- գրում է ալիքը:
Մոսկվայի Վնուկովո և Դոմոդեդովո օդանավակայաններում գիշերը սահմանվել են ինքնաթիռների ժամանման և մեկնման սահմանափակումներ: Այս սահմանափակումները վերացվել են առավոտյան:
Թարգմանությունը՝ Էմմա Չոբանյանի
