Իրանական բանտում գտնվող Խաղաղության Նոբելյան մրցանակի դափնեկիրը հոսպիտալացվել է

Խաղաղության Նոբելյան մրցանակի դափնեկիր, 54-ամյա իրանցի իրավապաշտպան Նարգիս Մոհամմադին, որը պատիժ է կրում Իրանի հյուսիս-արևմուտքում գտնվող Զենջանի բանտում, առողջական վիճակի կտրուկ վատթարացման պատճառով տեղափոխվել է հիվանդանոց։ Նա մեկ օրում երկու անգամ կորցրել է գիտակցությունը և տարել ծանր սրտային նոպա։ Այս մասին ասվում է The Narges Mohammadi Foundation կայքում հրապարակված հայտարարության մեջ, որը հիմնադրել է նրա ընտանիքը։

Հոսպիտալացումը դարձել է անխուսափելի այն բանից հետո, երբ բանտի բժիշկները եզրակացրել են, որ նրա վիճակը տեղում հնարավոր չէ վերահսկել, չնայած մշտական բժշկական խորհուրդներին, ըստ որոնց՝ նրան պետք է բուժի Թեհրանում մասնագետների թիմը։ Նրա ընտանիքը, որը մի քանի շաբաթ շարունակ փորձում էր ապահովել նրա տեղափոխումը համապատասխան բուժհաստատություն, այս հոսպիտալացումը բնութագրել է որպես հուսահատ, «շտապ» միջոց, որը, հնարավոր է, «շատ ուշացած է՝ նրա կենսական կարիքները բավարարելու համար»։

Իրավապաշտպանը շտապօգնության մեքենայով տեղափոխվել է Զենջան նահանգի տեղական հիվանդանոց։ Տեղափոխումը տեղի է ունեցել 140 օր կալանքի տակ գտնվելուց և մասնագիտացված բժշկական օգնության տրամադրման մշտական մերժումներից հետո։

Փաստաբանը նշել է, որ վերջին օրերին Նարգիս Մոհամմադիի մոտ արձանագրվել են զարկերակային ճնշման կտրուկ տատանումներ։ Երկու կաթիլային ներարկումներից և սրտխառնոցի դեմ դեղերից հետո բանտի բժիշկը կարգադրել է նրա անհապաղ հոսպիտալացնել։

Սկզբում Մոհամմադին հրաժարվել է տեղափոխվելուց, քանի որ տեղական հիվանդանոցներում բուժումը չափազանց վտանգավոր է և պետք է իրականացվի նրա վիճակին ծանոթ մասնագիտացված բժշկական խմբի կողմից։ Ընտանիքի խոսքով՝ խոսքը Թեհրանի «Պարս» հիվանդանոցի բժիշկների մասին է։

Մի քանի ժամ անց, հերթական ուշագնացությունից և վիճակի հետագա վատթարացումից հետո, իրավապաշտպանին զննել է նյարդաբանը և տվել անհապաղ հոսպիտալացման հրահանգ։ Մոհամմադին շտապօգնության ծառայության միջոցով տեղափոխվել է հիվանդանոց և հոսպիտալացվել ինտենսիվ սրտաբանական բաժանմունքում, սակայն նրա զարկերակային ճնշումը շարունակում է խիստ տատանվել։

Նարգիս Մոհամմադին ձերբակալվել է 2025 թվականի դեկտեմբերի 12-ին՝ իրանցի իրավաբան և իրավապաշտպան Խոսրով Ալիկորդիի հիշատակի միջոցառման ժամանակ։ Ավելի ուշ՝ 2026 թվականի փետրվարի 8-ին, նրան դատապարտել են 7,5 տարվա ազատազրկման։

Մոհամմադին արժանացել է Խաղաղության Նոբելյան մրցանակի 2023 թվականին՝ «Իրանում կանանց ճնշման դեմ պայքարի և բոլորի համար մարդու իրավունքների ու ազատության պաշտպանության համար»։