Ռուսաստանի առաջատար սոցիոլոգիական կենտրոններն արձանագրում են՝ Պուտինի վարկանիշը նվազել է

Հարցված ռուսաստանցիների 73%-ը կարծում է, որ ՌԴ նախագահ Վլադիմիր Պուտինն «ավելի շուտ լավ» է կատարում նախագահի պարտականությունները, այս մասին վկայում է Հանրային կարծիքի հիմնադրամի (ФОМ) ուսումնասիրությունը, գրում է Meduza-ն։

«Агентство»-ի տվյալներով՝ սա ամենացածր ցուցանիշն է 2022 թվականի փետրվարի 25-27-ից ի վեր, երբ այն կազմում էր 71%։

Մեկ շաբաթ առաջ ФОМ-ը հաղորդել էր, որ հարցվածների 76%-ը Պուտինի գործունեությունը գնահատել է «ավելի շուտ լավ»։ Այդ ժամանակ հարցվածների 74%-ը նշել էր, որ վստահում է նրան։ Վստահության ցուցանիշն այժմ նվազել է մեկ տոկոսային կետով՝ հասնելով 73%-ի։

Հարցվածների այն հատվածը, ովքեր կարծում են, որ Պուտինը «բավականին վատ աշխատանք» է կատարում, մեկ շաբաթվա ընթացքում աճել է երկու տոկոսային կետով՝ հասնելով 13%-ի։ Հարցվածների 17%-ը նաև նշել է, որ չի վստահում նախագահին, ինչը շաբաթվա ընթացքում երեք տոկոսային կետով ավելի է։

Անկախ «Լևադա կենտրոնը» երեկ հրապարակել էր իր հարցման արդյունքները։ Դրանք ցույց են տալիս, որ Պուտինի՝ որպես նախագահի հավանության ցուցանիշը 2026 թվականի ապրիլին հասել է 79%-ի։ Կենտրոնը նշել է, որ այս ցուցանիշը վերջին վեց ամիսների ընթացքում դանդաղորեն նվազել է։

Հանրային կարծիքի համառուսաստանյան ուսումնասիրության կենտրոնը (ВЦИОМ) Վլադիմիր Պուտինի վարկանիշի անկում է գրանցել յոթ շաբաթ անընդմեջ։ Ապրիլի 24-ին հրապարակված հարցման արդյունքները ցույց են տվել, որ հարցված ռուսաստանցիների 24,1%-ը վստահություն չունի Վլադիմիր Պուտինի նկատմամբ, իսկ 23,3%-ը հավանություն չի տալիս նրա գործունեությանը։

Միևնույն ժամանակ, Meduza-ին հայտնի է դարձել, որ Կրեմլը նախկինում Ռուսաստանի կառավարությանը հավատարիմ լրատվամիջոցներին խորհուրդ է տվել հատուկ հղում անել ФОМ-ի վարկանիշներին կամ ընդհանրապես չհրապարակել դրանք։

Պուտինի վարկանիշը կտրուկ անկում է ապրել Telegram-ի արգելափակման և բջջային ինտերնետի սահմանափակումների, ինչպես նաև գների բարձրացման և պատերազմից ռուսաստանցիների հոգնելու պատճառով, Meduza-ին ասել է Կրեմլի հետ աշխատող քաղաքական տեխնոլոգը։ Իր վարկանիշի անկման ֆոնին՝ Պուտինը կոչ է արել պատգամավորներին և սենատորներին «չկենտրոնանալ միայն սահմանափակող օրենքների վրա»։

Թարգմանությունը՝ Էմմա Չոբանյանի